方太糕品舖 (已搬遷) 新店位置

幫襯咗方太糕品舖咁多年，一直佩服佢堅持食材落足靚料，有時都幾擔心佢成本捱唔住。依家見佢重開番，好開心，希望佢繼續經營到喇，我哋出面好難搵到咁樣即蒸即賣、新鮮出爐的糕點。方太的糕點都香口彈牙，唔甜，比酒樓好食好多，仲要平到15蚊3件任揀，我通常都每款買D來食，過下口癮。不過放工過去好難一次過買齊十幾款，佢通常放工時段已經被圍到水泄不通，有些糕點已經被賣清了。作為糕迷，最鍾意食嘅係紅豆糕和芝麻卷。紅豆糕超多紅豆，滿滿大紅豆粒粒分明起沙，豆香四溢。芝麻卷俗稱「菲林」，爽口香濃，芝麻味爆燈，這口感係其他糕點不能比擬的。這裡的馬豆糕好獨特，我哋平日食到嘅係果種軟冧冧雪凍咗的馬豆糕，好快會融。但方太馬豆糕唔洗雪藏，有更好的口感和椰香味。千層糕則賣相最為吸引，每層的厚度相同，仲有好香椰汁味。砵仔糕和白糖糕都好好食。新年前仲見到方太賣好多一盤盤的年糕、紅豆糕、馬蹄糕，方太話好多盤都已經畀人訂左，要提早落訂先有喎。