壹堡餐廳小廚 (已結業)

壹堡餐廳小廚睇落去好似一間普通茶餐廳咁，但係一到晚市呢，你就會發現佢內有乾坤！佢嘅小菜呢非常之出色，除咗街坊之外呀，唔少附近建築地盤嘅朋友仔收工都會過嚟食飯，都證明咗呢度小菜真係好夠鑊氣！小菜呢都有分唔同價錢，有啲呢就應該係份量多啲料靚啲呢就大概一百蚊碟。但係都有特價嘅小菜餐牌，適合街坊日常食，七十幾蚊就有一碟餸。不過呢係今次我胃口麻麻地，都係叫咗特價晚飯套餐，仲要叫咗兩個都係煲仔小菜，好送飯。麻婆豆腐蝦球煲，麻辣味好香，豆腐呢都唔會太易爛，蝦球亦都吸收到香味食落爽口，呢個餸真係非常好送飯！蝦米粉絲節瓜煲，想食啲蔬菜但係又真係唔想叫菜，咁就食下瓜啦。有蝦米做味道嘅擔當令到粉絲同節瓜都好香，又係一啖一啖飯咁送！