牛摩+ (新都城中心二期) (已結業)

呢間餐廳門口有大玻璃幕牆令人一睇就知係高檔餐廳。裏面亦都好大，有好多二至四人枱同埋座艙，坐得好舒服。我哋揀咗壽喜燒同蕃茄湯嘅鴛鴦鍋，都唔錯。肉方面，六款牛肉之中，最正係牛小排，肥瘦啱啱好，食落好軟，牛味都幾香。第二正係牛板腱，有啲筋，多啲口感。海鮮方面都好出色，海蝦好新鮮又大隻，叫幾多就有幾多🤣自助區嘅菜都好新鮮，補充得好快，特別係有羽衣甘藍，出面賣好貴架！自助區仲有唔同嘅火鍋料，蔬菜、肉丸、麵條樣樣齊備。仲有咩？竟然仲有壽司🍣佢哋嘅炸物都好正，叫完就即刻炸，七味炸雞翼一定要試下，外脆內嫩，好好味！我哋仲叫左溫泉蛋牛肉飯，個牛肉似台式魯肉，別有一番風味！總括黎講，呢間餐廳真係好正啊，食物嘅選擇好多，一定要嚟試下啵！