影片
更多
2016-09-21
1651 瀏覽
今個中秋，難得大部分屋企人都放假，梗係要去玩下。行山呢類有益身心嘅活動，當然一呼百應啦。不過，正所謂：「假日通街都係人，離島人多到陸沉」，仲要我地有老有嫩，究竟去邊度好呢？左諗右諗，最後都係決定去南丫島。行程中最頭痛就係決定喺邊度搵食。雖然香港出名食海鮮，但作為香港人，我地好清楚，香港地可以食到貨真價實海鮮嘅地方，其實唔多，有啲甚至隨時附送黑臉。所以一直以來去得食海鮮，預咗銀包大出血之外，呃抨、味精都實走唔甩。但今次連平時零運動嘅70歲老爸都肯一齊行，對我地黎講係一個歷史性創舉，個震撼度，絕對勁過"亮黑版唉瘋七📱"。所以行完之後，點都要搵啲好嘢孝敬佢老人家。當諗到頭就黎爆，突然諗起一位喺南丫島返工嘅朋友。佢一年逗留喺南丫島嘅時間，仲多過喺香港島，絕對可以稱得上半個南丫人，加上佢自己煮得兩手，對食物有返咁上下要求，於是立刻Whatsapps 佢，求佢指點迷津。朋友強烈推介「榕樹灣 - 民豐」，仲叫我一定要點「糯米蟹煲」。以往入南丫島，慣性喺島嘅另一邊搵食，比較少揀榕樹灣。但既然係朋友推介。好！就一於試試...當日我地5大3細，分別點咗：白灼蝦、清蒸石斑、糯米蟹煲、辣酒東風螺、牛油炒蜆、風
不過，正所謂：「假日通街都係人，離島人多到陸沉」，仲要我地有老有嫩，究竟去邊度好呢？左諗右諗，最後都係決定去南丫島。
行程中最頭痛就係決定喺邊度搵食。雖然香港出名食海鮮，但作為香港人，我地好清楚，香港地可以食到貨真價實海鮮嘅地方，其實唔多，有啲甚至隨時附送黑臉。所以一直以來去得食海鮮，預咗銀包大出血之外，呃抨、味精都實走唔甩。
但今次連平時零運動嘅70歲老爸都肯一齊行，對我地黎講係一個歷史性創舉，個震撼度，絕對勁過"亮黑版唉瘋七📱"。所以行完之後，點都要搵啲好嘢孝敬佢老人家。
當諗到頭就黎爆，突然諗起一位喺南丫島返工嘅朋友。佢一年逗留喺南丫島嘅時間，仲多過喺香港島，絕對可以稱得上半個南丫人，加上佢自己煮得兩手，對食物有返咁上下要求，於是立刻Whatsapps 佢，求佢指點迷津。朋友強烈推介「榕樹灣 - 民豐」，仲叫我一定要點「糯米蟹煲」。
以往入南丫島，慣性喺島嘅另一邊搵食，比較少揀榕樹灣。但既然係朋友推介。好！就一於試試...
當日我地5大3細，分別點咗：
白灼蝦、清蒸石斑、糯米蟹煲、辣酒東風螺、牛油炒蜆、風沙雞、金𥖁豆腐、揚州炒飯
先講講點餐情況，因為3位小朋友，分別強烈要求食白灼蝦、蒸魚、揚州炒飯。既然小朋友要求到，冇理由掃佢地興，加上其中一個小朋友係揚州炒飯迷，人仔細細可以鯨吞一碟炒飯。所以我二話不說要求揚州炒飯「加大」。
原來仲打算叫埋「椒鹽瀨尿蝦」，但落單嘅店員竟然話：「其實你地已經有白灼蝦，再點瀨尿蝦，好似有點重複。而且你地只得5個大人，不如幫你連個風沙雞都改埋要半隻。好嗎？」
我當然答好，但心諗，呢個伙記都幾特別。我以往去食海鮮，對方理得你啲海鮮有冇重疊，更加唔會諗你食唔食得晒，佢地淨係會話：「驚食唔晒？果度唔係好多嘢咋喎。想食椒鹽瀨尿蝦呀？無問題，兩隻都整到.....」但民豐嘅伙記，竟然有錢唔賺？？
後來我先知道，呢位幫我落單嘅伙記，原來係民豐老闆。我真係有眼不識泰山@@
無幾耐，餸菜陸陸續續送到....
先來"金𥖁豆腐"
原先我對呢碟豆腐沒太大期望，點知原來勁好味！炸皮不厚但脆，豆腐超軟滑。
"白灼蝦"
隻隻鮮甜彈牙（無錯，係隻隻）
以往食親白灼蝦，一斤總有4、5隻霉肉死蝦，但呢碟白灼蝦，真係隻隻都鮮甜無比。小朋友們更一隻接一隻，口中都未呑完，已問碟上剩返嘅，可唔可以留比佢地食。
"牛油炒蜆"
蜆大隻冇沙，隻隻開口不在話下。牛油炒都冇搶走蜆肉鮮甜味。甚至連同炒嘅洋蔥都好味到可以撈一碗飯。
"辣酒東風螺"
我自己本身唔太鍾意食螺，總覺得平時食嘅螺肉好硬好頂胃。但呢碟完全冇得彈，螺煮得剛剛好，肉質軟熟。碟中另一亮點，就係墊㡳嘅葛粉，完全吸收晒整碟辣酒螺嘅精華。超級惹味！讚！
"風沙雞"
貌似炸子雞。初初以為啲肉應該會幾鞋。殊不知連雞胸都皮脆肉滑，味道又剛剛好，唔會太咸。
"糯米蟹煲"
是晚主角，果然冇令我失望。
先講講個蟹，蟹肉質地飽滿、結實，絕不是水蟹。
糯米飯，粒粒飽滿分明，沒有黏埋一pat pat， 完全沒有油膩感，連食兩碗亦唔覺漏。（朋友果然冇介紹錯。正！）
仲有一點值得一讚，糯米飯完全沒有蟹殻碎。食蟹煲，好味固然重要，但如果爬爬下飯，咬到蟹殻，立刻乜嘢feel都冇哂，淨係feel到好煩！
"清蒸石斑"
魚蒸得剛剛好，但因為之前幾碟實在太出色，所以相對之下，冇乜嘢寫。
"揚州炒飯"
呢個飯，我主要讚嘅唔係味道，而係細心和智慧。老實講，我真係冇諗過啲海鮮咁足料，食到個魚，我地已經飽咗7、8成。但落單嘅時候，因小朋友鍾意食炒飯，所以我要求加大。正喺度諗緊一陣碟King size 炒飯點算，肯定食唔晒，實要打包嘅時間。
老闆送上炒飯時，竟然話：「我擔心你地食唔晒，所以幫你改返例牌，寧願一陣唔夠先再加」
老闆一定係見慣人，佢洞悉到我呢種人「為食又貪心，乜都想試勻」，但又唔理食唔食得哂。所以佢當機立斷幫我改返做例牌。如果唔係佢細心＋有智慧，我諗我實要對唔住地球先生（用外賣盒）。
食埋老闆送嘅果盤，我地就好滿足咁去搭船返中環。老爸搭船果陣，猛話個蟹煲超好食，個糯米飯冇得頂，白灼蝦鮮甜又彈牙，牛油炒蜆唔止香，連D洋蔥都好好食......（下刪500字）
今年能夠有個小朋友又開心，老人家又滿意嘅中秋家庭樂，全靠朋友好推介。但作為好友，有咁正嘅地方竟然唔一早講，你話係唔係離譜吖。
****
我從來冇諗過自己會寫食評，
亦唔認同相機食先嘅潛文化。
因為我成日覺得一碟熱辣辣、香噴噴嘅食物遞到你面前，你竟然可以......比 iPhone 食先？？ 你話iphone有味蕾就話啫=.=#
所以呢篇食評會係零圖片。
但因乜解究我今次會寫咁大篇嘢？
原因係「香 港 終 於 有 名 物 喇 ！」
以後有外國朋友黎香港，我可以帶佢地一嚐 香港真•出色嘅海鮮喇!
張貼