泰金國

營業中

休息中

今次去咗泰金國食晚飯，喺九龍城都算好出名，歷史悠久，好多人都介紹個燒牛肉，一於去試吓。啱啱好6:00去到，坐咗最尾一張枱，走嗰陣出邊已經排長龍。兩個人，叫咗燒牛肉、蝦膏炒飯、生菜包、飛天通菜、百香果沙冰同埋泰式奶茶。燒牛肉好大碟，基本上枱枱都有叫，燒出嚟隻色好靚，大概五成熟，好多人都讚個汁，但係我覺得就咁食好食啲。蝦膏炒飯新鮮炒起好香，大大碟幾抵食。生菜包同通菜都唔錯，冇乜特別。至於兩杯嘢飲，個百香果沙冰應該係糖水溝出嚟，味道麻麻哋。泰式奶茶就幾好飲，茶味香，同港式奶茶相比係第二種風味。聽過人講喺嗰度加單會俾人鬧/黑面。我哋落單嗰陣已經同我哋講只可以加一次單，我哋加單之後就收咗我哋本Menu，但就冇唔友善嘅態度。兩個人最後食咗$396，食唔晒要打包。總括嚟講，食物質素幾好，性價比幾高。服務都唔錯，有求必應，係坐得迫咗少少。但係都推介嘅。