Chapter 3 Steak Bar & Restaurant (已結業)

約朋友食飯，諗住搵一間坐得舒服方便傾計嘅地方，見到呢間餐廳座位都幾闊落，幾有情調，一於試吓。點咗二人套餐，性價比都幾高，仲可以以半價點雞尾酒兩杯。 龍蝦海鮮忌廉湯忌廉湯濃而不鹹，龍蝦味唔腥。湯入面有魷魚粒同龍蝦肉，都幾足料。 鵝肝多士鵝肝油脂香味重，加咗黑醋，酸味降低油膩感，唔錯。 水牛城雞翼幾惹味，唔會太辣，少少醬汁裹住雞翼，仲保留咗少少香脆嘅口感。 炭烤澳洲安格斯肉眼扒點咗七成熟，熟度正確。肉眼扒腍甜，帶炭燒香味。 龍蝦汁大蝦海鮮燉飯海鮮份量都幾多，有大蝦、青口、蜆肉同魷魚，每一啖都食到海鮮同飯。燉飯處理得唔錯，唔會好膩口。 紫薯鮮奶有淡淡嘅紫薯味，都幾甜，唔算太稠，飲落好順口。 雜莓比利時鐵鍋鬆餅蛋味好重，合桃香脆，雜莓酸酸甜甜。新鮮焗起嘅鬆餅熱辣辣，加埋冰凍嘅雪糕，增加口感層次。