影片
更多
2023-11-01
565 瀏覽
偶然喺Openrice見到，同第一次見面嘅朋友食飯，佢喺油麻地收工，所以我揾咗幾間喺油麻地可以食嘢嘅地方俾佢揀，呢間超近地鐵站，勁方便，佢最後揀咗呢間，朋友真係有眼光，因為嚟到之後令我非常驚喜。雖然係外賣店，但係隔嚟有店家嘅共享休憩空間，可以坐低食嘢、唱K，仲有個白板可以畫畫，成個地方都好舒服，老闆同老闆娘人又nice，我地喺隔嚟食仲拎過嚟俾我地。二人餐係$159蚊，人均80蚊，包兩份主食（粉麵飯），一set兩款嘅小食組合，一份涼拌菜，兩杯手搖飲品，兩份甜品，amazing！如果係平時出街食其他嘢，要有呢個豐盛嘅程度，可能呢個二人套餐嘅價錢淨係夠order一個一人餐。相片我冇影齊，我地叫咗滷水雞翼滷肉飯同鹽酥雞粒滷肉飯，小食組合揀咗炸地瓜條+香蔥餅（印象中好似有四塊），涼拌菜係fix咗嘅涼拌木耳青瓜片，我嘅飲品係綠茶多多，朋友飲脆脆阿華田，甜品我揀咗黑糖珍珠仙草芋圓，朋友揀嘅係紫薯鮮奶布丁。呢個係我嘅滷水雞翼滷肉飯，我第一眼見到以為得兩舊雞翼，都已經覺得好合理，食多陣先發現原來有四隻，我好感動，係我阿媽先會一餐放四隻俾我，平時出街食飯，如果配菜係雙拼，頂盡得兩隻。雞翼仲要整得好香好軟嫩
雖然係外賣店，但係隔嚟有店家嘅共享休憩空間，可以坐低食嘢、唱K，仲有個白板可以畫畫，成個地方都好舒服，老闆同老闆娘人又nice，我地喺隔嚟食仲拎過嚟俾我地。
二人餐係$159蚊，人均80蚊，包兩份主食（粉麵飯），一set兩款嘅小食組合，一份涼拌菜，兩杯手搖飲品，兩份甜品，amazing！如果係平時出街食其他嘢，要有呢個豐盛嘅程度，可能呢個二人套餐嘅價錢淨係夠order一個一人餐。
相片我冇影齊，我地叫咗滷水雞翼滷肉飯同鹽酥雞粒滷肉飯，小食組合揀咗炸地瓜條+香蔥餅（印象中好似有四塊），涼拌菜係fix咗嘅涼拌木耳青瓜片，我嘅飲品係綠茶多多，朋友飲脆脆阿華田，甜品我揀咗黑糖珍珠仙草芋圓，朋友揀嘅係紫薯鮮奶布丁。
呢個係我嘅滷水雞翼滷肉飯，我第一眼見到以為得兩舊雞翼，都已經覺得好合理，食多陣先發現原來有四隻，我好感動，係我阿媽先會一餐放四隻俾我，平時出街食飯，如果配菜係雙拼，頂盡得兩隻。雞翼仲要整得好香好軟嫩，滷肉都鹹香又彈牙，味道啱啱好，幾有家常感覺，仲有兩片酸蘿蔔可以食到一半refresh一下個口腔繼續食。
朋友嘅鹽酥雞塊我都食咗一舊，香脆有肉感，完全唔柴，好食。
地瓜條超大一份，外面好香脆，裡面好有番薯味，不過食到後面個口有d乾，我拎嚟點咗一下我甜品d黑糖漿，又幾正。如果之後有其他口味就好，例如海苔粉、酸梅粉，不過我淨係睇咗二人餐嘅menu，二人餐呢個係原味嘅，其他menu我冇仔細睇。
香蔥餅係真的香，我最初以為佢會係一塊煎餅切成一塊塊，原來係一粒粒小圓餅，非常好食，皮係類似糯米嗰種半透明嘅餅皮，裡面有d蔥，同埋我食出咗韭菜煎餃嘅香味，可能有類似嘅餡料，入面都幾juicy，正！
涼拌木耳青瓜片係辣嘅，調料頗有川菜嘅風味，香辣，但係有d鹹，有d豆瓣醬嘅香味，特別嘅，呢個涼菜撈飯好食。
飲品方面，我杯綠茶多多符合預期，我叫咗少冰少甜，幾清新，不過朋友就話佢杯脆脆阿華田有d普通，我飲咗啖覺得的確冇我嗰杯好飲，佢個基底係類似茶餐廳凍華田嗰種口味，朋友好似話裡面有d oreo同cream，但同個base唔係好融合到，我覺得如果佢係類似McCafe嗰種阿華田飲品咁比較milky嘅應該會融合得好d，下次嚟再試下其他飲品。
呢個係黑糖珍珠仙草芋圓，好colorful，唔係虛假嘅顏色，食落去真係有濃郁嘅對應味道，即係抹茶味、紫薯味、芋頭味、番薯味呢d，係真係存在，芋圓嘅口感非常Q彈，煮得好好（因為我自己煮過，煮到一pat嘢），每一啖細品都可以食到個味道，好出色，珍珠同仙草都同想象中一樣好味，食嗰陣可以撈下底下d糖漿再食。我覺得呢個好出色。
朋友杯紫薯鮮奶布丁都好香，佢好鐘意，布丁嘅texture係軟滑嘅，非常有奶香味，紫薯泥都好濃郁，同鮮奶布丁味道好夾。
我地兩個人食到勁飽，好耐冇試過食得咁舒服、盡興、又唔肉痛。D嘢食好足料，性價比高，而且包裝我都覺得揀得好好，幾好睇同實用，第一眼望落去有種好似唔算大份嘅幻覺，但其實裡面深不見底。
係尋日嚟嘅，萬聖節所以畫咗d好有萬聖節氣氛嘅嘢。本身完全冇特別plan過要出嚟玩，只係打算同朋友隨便食嘢行下，但呢度環境真係幾有Party room感覺，即刻成個人都好有過節嘅氣氛，估唔到我嘅開飯環節都會咁開心。
可惜我住上水加上唔係成日出市區，如果我住附近應該會成日幫襯，佢地單點嘅價錢都好划算。不過我已經推介咗比朋友，之後約其他frd都會嚟繼續支持下。
今次應該係我第一次喺Openrice打食評，因為呢間真係太少評價，我最初揀嗰陣都係本著賭博嘅心情，見性價比高先嚟，結果發現超正。所以我希望我寫完之後其他人睇完會有多d資訊可以參考。最後祝巴豆妖長做長有！
張貼
