香港地 (已結業)

Ben Sir要闊別香江轉戰荷蘭兩週，臨行前緊係同佢食餐地道菜餞行啦。我地特意揀左美心集團旗下連鎖式茶餐廳「香港地」，以慰佢思「香」之情。野食方面試左新登場的花膠竹笙素翅配欖菜蛋炒飯套餐（試食價$65），簡直創造力量同幻想會嚇你一跳，抵讚！竹笙砌成一圈圈爽口唔在講，仲有港式碗仔翅唔少得的冬菇絲同埋黑木耳，輕鬆重溫「魚翅漱口」黃金歲月。再黎媲美「黑松露」的欖菜蛋炒飯，「魚翅撈飯」香港夢立即垂手可得？雖然花膠素翅膠味十足，但創意無價值得推介！我就鍾意地道中心名菜「菜遠牛肉」客飯套餐（$66），先講條菜心比較硬身，但係絕對咬得入，估計係廚師用快炒刻意經營出爽脆效果，唯獨係細路仔同老人家未必夠牙力食。牛肉應該有輕輕比梳打粉乸過，味道可以接受。尤其喜歡佢地砌成平行四邊形的小薑片，真係薑愈老愈辣！港式茶餐廳配以現代化連鎖店管理，令我地可以隨時食到本土風味，值得同熱愛這片土地的我與你一起去幫襯，下次再見！