津津食店 (已結業)

朋友喺大嶼山梅窩行完山， 又攰又渴又肚餓，剛剛好在午飯時間，梗係要搵一餐好嘢食啦，朋友住咗喺梅窩十幾年 ，知我對食物有要求，便帶我去一間好味街坊小菜，好彩行早一步， 遲五分鐘便要排隊等位。朋友推介越南春捲撈檬，我叫咗越南春捲拼香茅豬扒雙拼撈檬，春捲好脆又香口，浸咗落汁一陣都仍然鬆脆，越南酸甜魚露汁好醒胃，少少酸少少辣， 我落咗半碗汁浸住個撈檬，好滋味。我見到隔離枱叫咗一個越南春捲小菜，七十幾蚊有六條，我覺得我好精靈，要雙拼好抵， 只係加六蚊便有兩條春捲。但是豬扒就唔啱我口味，比較瘦、太有口感、乾咗啲。蕃茄牛腩湯檬，牛腩有水準， 幾林，就算瘦的都不會韌，有半個新鮮番茄，個 蕃茄汁幾好味。朋友飲汽水，好多選擇，有罐裝、 樽裝有大支裝、細支裝，滿足不同人嘅需要。最後值得一提，餐廳服務非常好(雖然有好多客)，唔怕我哋麻煩，食完之後，好有耐性，逐個餐同我哋寫低價錢，每個party寫返總金額，讓大家夾錢容易好多，值得一讚。