閨•家 (西九龍中心) (已結業)

深水埗西九龍中心一直都有一間幾出名嘅中式飯店，我朋友成日都話會去嗰度食家常便飯，於是今日經過就決定去試吓啦。聽朋友介紹就食過招牌豬扒飯配煎蓮藕餅，豬扒非常之軟熟入味，完全係感受到醃咗一段時間先去煮，加上表面有啲香茅，又有啲果汁味，令成個豬扒好Juicy 同美味，而蓮藕餅都煎得好香～朋友就食咗咖喱雞飯，咖喱夠晒香濃，個汁撈飯一絕，雞係比較健康嘅煮法，冇落油炸啱晒健身嘅朋友食多啲雞肉補充蛋白質哈哈😆另外仲叫咗兩個小食，一個係麻辣雞腎，另一個係炸饅頭。麻辣雞腎好多人叫，嚟到我哋嘅時候已經係最後一碟，份量勁多勁抵食，味道都OK，口感清涼又有啲麻辣feel，夏天食就正啦！炸饅頭就唔使講，夠晒邪惡，外脆內軟加埋煉奶，食幾多都唔厭😆😆 不過佢個炸饅頭個殼個人覺得可以再脆多少少厚啲，而家係薄脆啲～而且另外推介嘅位係，呢度仲會配埋冇味精嘅湯水，雖然呢度坐得比較迫少少，但係性價比真係極高，一個套餐50幾蚊有主食又有湯飲，真係不愧係我個friend嘅食堂。