博多拉麵別天神 (已結業)

週四晚o既大型舞會前，小肥先與兩位舞友喺其酒店附近間「博多拉麵別天神」食拉麵，補充定體力。喺門外等咗一陣，三口子好快就有位坐，為求速戰速決，故亦懶理要分開入座。感覺上「博多」銅鑼灣間分店比灣仔間大，不過食客都係圍繞著中央個開放式廚房坐，餐具、醬油、茶水均為自助式。頭頂同樣擺放著紙巾任用。一頁餐牌只有中文同日文，幸好兩位外籍友人都懂得看圖點菜，溝通上總算冇乜大問題。別天神套餐（$105）之餃子：跟餐o既餃子每客有四隻，皮薄餡嫩，簡單味佳。小龍蝦蟹子沙律：同樣點咗個套餐o既好友就揀咗食小龍蝦蟹子沙律作小食。佢大讚用紫菜包住個小龍蝦蟹子沙律黎食，效果香脆又清涼，感覺好新穎咁話。別天神套餐（$105）之豚骨湯麵：湯麵濃郁o既湯底甜美可口，而且一啲都唔油膩。幼幼o既麵條軟硬適中，兩片大大塊豚肉則軟腍柔潤，極易入口。湯料中o既香蔥及雲耳亦爽脆非常。吃畢腸胃實感大滿足！