阿聰師 大甲芋頭Q
就咁睇個名未必明係咩，其實佢係芋頭酥。呢間嘅酥皮特別透薄酥脆，而芋頭Q即係芋頭麻糬餡，芋蓉綿密香甜，而麻糬黏但唔癡牙，增加口感層次。另外仲有普通芋頭酥同芋頭蛋黃酥，奶蛋素人士都可以食。全部都係純手工製作，送禮都夠得體。
老楊 櫻花方塊酥 & 典藏巧克力方塊酥
唔係香港嗰隻三十三層方塊酥，佢地嘅方塊酥以糅合傳統方法、創新口味同得意包裝出名。1979年創立，到而家已經變化出超過三十種口味，當中比較得意嘅有少見嘅櫻花味，呢個禮盒包裝仲得過2009台灣視覺設計鉑金獎。另外朱古力口味係店內長期熱賣之選，甜而不膩。而且兩款都係獨立包裝，請同學同事食都啱。
阿舍 淺色系蕃茄麵
未聽過阿舍大名嘅人可能會問點解要推介即食麵，聽過阿舍乾麵嘅又會話香港都有啦...係，香港某大型超市的確有佢地嘅台南乾麵，但暫時仲未有呢隻蕃茄麵！而且佢係2015年「全球十大美味即食麵榜」唯一上榜嘅台灣代表，麵條不經油炸而且香草番茄醬非常香，乾撈或者煮成湯麵都靠得住！
李儀 奶油太陽餅
無辦法，佢地個包裝係就係老土啲，但單睇奶油太陽餅個Package其實好吸引。普通太陽餅一係就唔夠酥脆，一係就過於油膩，而呢間嘅太陽餅因為用牛奶奶油取代豬油嚟做酥皮，所以唔單止夠酥而且仲有奶油香味，裡面嘅麥芽糖都唔會太甜。唔怕麻煩嘅不妨叮熱佢再食，另有一番風味。
阮的肉干 筷子肉干
台灣豬肉乾有好多選擇，而呢間就勝在包裝正，首先全部都係細包獨立包裝，開心Share都方便啲，大包裝有得意公仔但唔會太花巧，買多兩包都唔會佔據你行李箱太多位。呢款筷子肉干係原創，造型搞笑之餘係用咗高溫鎖住肉汁，方便食又好味。不過分比人之前記得收起張宅配到港嘅傳單先...
老天祿滷味 鴨舌
以上嘅手信覺得太普通？咁不如試個重口味嘅...開飯仔我指好重滷水香味嘅鴨舌啫。去台灣夜市必試嘅滷味就帶唔到返嚟，但可以去滷味店買處理好嘅，而呢間有半世紀歷史老店當中最好賣嘅就係鴨舌！雖然有人話食鴨舌就好似同隻鴨Kiss咁，但聽聞食上癮之後就會停唔到口。接受唔到鴨舌嘅，都仲有鴨翅可以揀嘅。
阿默 荷蘭貴族手工蛋糕
買完手信比兄弟朋友同學同事姨媽三叔等等等等之後，不如都買份手信比爸爸媽媽。其實好多時候呢份先最難買，因為唔可以就咁用靚包裝或者特別口味嚟Hea咗佢。呢個時候，揀有口碑嘅一定無錯。呢間嘅千層蛋糕早喺1994年品牌啱啱成立嘅時候就已經非常出名，經過二十年依然穩坐唔少台灣人心中嘅第一寶座，包裝低調平實而入口香濃扎實。
隨時接收最新資訊
讚好OpenRice專頁！
關鍵字
台灣
手信
芋頭酥
肉乾
滷味
複製到剪貼簿