有飲開手工啤嘅朋友，對掌門呢個名應該唔會太陌生，不過以往一係就要飛去台灣飲，一係就喺少部分嘅酒吧或者大型啤酒節活動先至飲得到。但以後就方便好多喇，香港都有門巿分店喇，係佢哋第一間嘅台灣境外分店嚟呀！以後Happy Friday又多一個chill點喇！

香港舖位於尖沙咀，門面裝修同台灣店嘅風格都好相似，暫時可以試到24款酒款，甘、酸、苦等等嘅味道都有，全部由台灣自家酒廠釀製，再新鮮直送到港。

用百分百純大麥小麥、酵母加各類嘅啤酒花釀製出嚟嘅手工啤，比一般商業啤酒嘅釀造過程更精細同嚴格，口味同層次亦都豐富好多。

例如好似Professor X咁，色澤較黑，麥芽味突出，酒體淳厚濃烈，甘中帶香，有啲朱古力同咖啡嘅感覺。另外有隻酒花日係Session IPA嚟嘅，飲落好清新，仲有啲柑橘嘅果香味，女生應該都會幾鍾意。而如果想要酸少少嘅，就可以試下酸酸嘞，呢隻屬於德式家族，隻色望落有少少濁嘅手工啤，飲落好爽，配埋雞泡魚干食幾好。

除咗手工啤之外，都仲有啲台灣地道小食同各式嘅燒物，好似燒白膳呀、燒和牛呀等等，佐酒啱晒！

掌門精釀啤酒
地址：尖沙咀金巴利道64-66A順輝大廈1號舖

文、相：Kar




其他新店介紹：
越南越愛！人氣牛肉粉專門店登陸觀塘
海底撈預計年中進駐油麻地 唔洗上深圳都嘆到肉麻服務？
東京築地海鮮丼専門店登陸油麻地 飛天鮪魚X海膽霸氣之選（有片）







隨時接收最新資訊
讚好OpenRice專頁！