江順名滙

營業中

休息中

【油尖旺區】【江順名匯】同事牛雄哥榮休，作為公司最後生嘅老鬼，梗係要去賀佢畢業。成六圍枱都幾震撼，食吓前菜吹吓水就上菜喇。首先係「順德三太公」，即係「酥炸蜆蚧鯪魚球」、「手打鯪魚肉釀辣椒」同埋「手打鯪魚肉釀蓮藕片」。三款都幾有特色幾正，就上埋之後嘅「上湯大蝦伊麵」同「碧綠帶子珊瑚蚌」，兩者都唔錯。之後飲「天麻海雀燉魚頭湯」，好似幾足料，又唔會太濃。之後條魚係「清蒸碧海沙巴龍躉」，忍唔住喺現場都同同事講，幾好食。跟住嘅「蠔皇金錢扣鵝掌」正正常常，冇乜特別但味道算唔錯。之後到「彩虹芥末牛柳粒」，唔會好辣，牛柳粒又勁腍，小朋友至愛。我最期待「脆皮當紅炸子雞」，不過佢唔算整得好好，係有少少失望，坊間好多都比佢好。到澱粉質嘅時間，特色菜「籠仔排骨蒸陳村粉」幾惹味，不過略嫌啲味唔平均，時鹹時淡。最後嘅「蓮蓉小桃包」同「鮮果拼盤」都係合理發揮，算係一個唔錯嘅終結。餐飯唔知幾錢，總之每人夾 $400，祝牛雄哥生活愉快啦。。。（地址：尖沙咀彌敦道63號國際廣場3樓302號舖）#1amfoodie #foodie #hkfoodie #thatfoodiething #hkfood #food #in