La Postre (已結業)

喺永樂街間分店食過La Postre 嘅西班牙海鮮飯同麻糬窩夫一直念念不忘，放工後特登再去La Postre食飯，不過揀咗嚟九如坊的分店。鋪頭嘅裝修比起永樂街嗰間更具心思，而且比較少人， 感覺冇咁逼夾。舒適的環境令到我地心情大好，少不了西班牙海鮮飯 ，又嗌咗個西班牙蛋餅 , 燒牛仔骨，三杯Sangria。西班牙海鮮飯太過濕，影響啲飯嘅口感，上次去永樂街食明顯地係黏啲，而且啲番茄味係出啲。海鮮啲肉質有啲老，煮得太耐，真係唔得。真係名副其實蛋餅，食極都係好嚡嘅蛋，入面啲薯仔、火腿同洋蔥超少，完全唔掂。最火滾係個牛仔骨，好多筋，唔係好食到肉，而且個醬汁係好似整肉醬意粉嗰啲香草蕃茄醬，同啲牛仔骨勁唔夾，食嗰陣時我突然好懷念中式牛柳。價錢仲要成＄288，去鋸牛扒好過啦。成晚係得甜品可接受，窩夫味道好香，表皮香脆，同雪糕一齊食幾唔錯。如果鐘意食辣，可以試下墨西哥香辣麻薯窩夫，軟Q麻糬配上香辣味道，口感同味道可以話令人眼前一亮，雖然我地今次冇嗌到，但都想推介一下。（注：我係去永樂街分店食嘅，唔擔保呢間水準一樣。）