黑門水產すいさん (棉登徑)

呢間餐廳之前黎過一次，覺得好好食所以今日再黎，依然無令我失望~ 首先推介既係海膽蟹味噌甲羅燒，佢一開始會俾你影相先，見到啲海膽蟹肉蟹糕已經好想食。然後侍應姐姐會喺你面前開個爐燒，不過唔只呢個，係每一樣如果要燒既野佢地都會擺得好靚俾你影左相先，之後再喺你面前燒。望住啲野食慢慢變熟同埋啲香味飄出黎，呢個過程好令人愉悅~ 至於個甲羅燒真係好好食，連埋塊餅一齊放入口，真係一個極大既享受!之後要推介呢個黑門令大漁魚子醬脆脆包, 呢個真係好好味，個包勁脆，而上面既料係會多到跌出黎，而且所有野既味都好夾，如果未飽呢個係會想encore~跟住到個蜜糖芥末火灸安格斯牛肉沙律，呢個有啲驚喜係佢真係配合番水產既特色，喺呢個牛肉沙律入面仲會搵到一粒粒既飛魚子同三文魚片。你會食到蜜糖芥末既香同埋佢又有少少酸，好fresh好開胃。呢個黑門令龍蝦湯煮海鮮都勁好味，佢個龍蝦湯好正，啲海鮮一路燒既時候吸哂個湯既香味，但同時啲海鮮既鮮味又入番個湯入面互相交融，我同朋友唔止食哂啲海鮮，連個湯都飲埋。我覺得呢度每一樣食物都好有heart，除左擺盤靚，所有野都好切合餐廳個主題，用料好新鮮，當然最緊要係真係好好味~