新皇后餐廳 (已結業)

雖然深井有三間西餐廳，但睇得上眼，食得入口祇得呢一間，前一間牛仔餐廳祇係二流貨色，後一間意大利餐廳係鬼食意大利野咩，祇係一間不倫不類嘅另類自助餐，而皇后餐廳屬老字號，質素有一定保証。龍蝦牛柳餐，$428 已經係兩位嘅價錢，紅，白餐湯都一樣咁好飲，牛角酥夠熱又有牛油香味，舊牛油留返俾落餐湯仲好，因為龍蝦餐每人有一隻龍蝦，所以揀左頭盤做龍蝦沙律，沙律係餐廳招牌野薯仔沙律，加上龍蝦肉，咁嘅配搭點可能唔好食？各位咪以為龍蝦餐D 龍蝦梗係雪藏野仲要丁咁大隻得個殼冇乜肉食？咁諗就大錯特錯，雖則龍蝦唔係新鮮貨色，但亦係冰鮮有肉味個隻，夠彈牙，一隻十両重以上，用料一D 都唔馬虎，另外半隻芝士白汁焗，芝士味濃配龍蝦味剛好，食完一隻龍蝦已經飽左九成，重有一塊手掌心咁上下大嘅牛柳配薯菜，牛柳雖然非用上靚野，食入口都算腍滑，加上黑椒汁惹味，最後亦消滅埋佢，但係咁嘅份量簡直係挑戰人類胃口極限，餐飲凍檸水預左冇乜驚喜，甜品有芝麻雪糕或者雜果揀，咁嘅份量四個女仔share 都夠有突。