又到Lunch Time，各位打工仔女又要煩去食咩？好彩呢個世界有Food Court，一站式畀大家唔同選擇。最近太古城中心就新開咗間以簡約清新為主題嘅美食市集，再忙都可以嚟食個炸蛋飯糰或者6x芝士三文治，用美食叉完電繼續搏殺！
Grab & Go 自選飯卷 Makirrito
知道各位打工仔女夠哂忙，方便外賣嘅飯糰同飯卷應該就係唔少人嘅Light Meal之選。黑松露龍蝦卷有大大件龍蝦尾，沾過黑松露醬更鮮美，龍蝦、蔬菜同飯嘅比例啱啱好，清新滿足。炸蛋飯糰足有網球大，外面炸到金黃香脆，入面糖心蛋一切開即見流心效果，零舍誘人！
呢間特別在糅合日本傳統卷物(Maki)同墨西哥捲餅(Burrito)，畀大家自己揀飯卷裡面嘅主菜、蔬菜、配料同醬汁等。每日都可以換唔同花款，而且仲有刺身飯杯、刺身沙律等，咁就唔驚好快食厭啦。
鐵板熱壓芝士三文治 Bake It Up!
做咩拎個燙斗壓住件三文治？其實呢塊鐵板係專門用嚟整熱壓三文治㗎！芝士控必試脆烤6X芝士三文治，顧名思義一份三文治裡面有齊Parmesan、Red Chedder、Mozzarella等六重芝士，拉芝效果超吸睛！畫龍點睛嘅係三文治出面嘅芝士脆片，一啖就食到芝士嘅唔同口感。
熱壓脆烤芝士三文治另外仲有雞肉牛油果、手撕豬肉、吞拿魚等唔同口味。同烘焙店Paper Stone Bakery合作，呢度嘅麵包都係現場即制，買多兩個做下午茶亦得。
將自拍飲落肚 Future Bar
有嘢食當然亦要有嘢飲啦，呢間飲品店最過癮嘅就係呢部咖啡列印機，只要你手機安裝指定Apps，就可以將你手機裡面嘅相Send去咖啡列印機，短短10秒一杯專屬咖啡就印好喇！無論你想將靚靚自拍，定係得意公仔飲落肚都無問題。
香港人越嚟越注重自己嘅健康，所以佢地特別同Green Monday合作，供應唔同配搭嘅新鮮水果沙冰。另外亦有健怡冷壓果汁、生果杯同包裝健康零食等選擇。
美食市集佔地17,000平方呎，入面仲有走年輕路線嘅茶居Cha Cha Room，主打泰越菜嘅MINH & KOK，升呢版港式茶餐廳Hong Kong Daily，賣新鮮即燒港式燒味嘅HK Rotisserie，同必試佢地招牌巴馬臣芝士黑松露意粉嘅Pasta La Vista。
最後仲要一提佢地嘅Pop-Up Store，今期請到百年老字號蛇王芬，呢兩日天氣轉涼去食返碗古法薈五蛇羹，或者鴛鴦腸糯米飯就啱哂。蛇王芬限定店到出年2月底，想知下一間進駐嘅會係咩餐廳，就記得留意開飯仔報道啦。
文：Cathy
開飯編輯推介：
2. 11月份好評餐廳十強
熱門文章推介：
2. 大埔墟街市一日五餐之選
隨時接收最新資訊
讚好OpenRice專頁！