最優秀開飯廣東菜館 (2016)
九龍塘學生飯堂 品香樓中西風味餐廳
如果你係香港九龍塘兩間大學，或者南山村附近中學嘅學生或者畢業生，你一定會聽過品香樓呢個大名。能夠成為學生飯堂，就係靠佢嘅拿手小菜：傳統中菜，有；創意Fusion菜，都有！
中菜代表係要預先訂先得嘅心機菜鹽焗手撕雞，雞肉嫩滑再加香口芝麻同沙薑醬，無得輸。另外南乳炸豬手嘅豬皮炸到脆卜卜，豬肉仲係Juicy，配埋鹹香南乳送飯送酒都一流。創意方面就有火焰牛柳粒，上枱即點火，賣相已經先贏，而且醬汁惹味而牛柳鬆軟，必點之一。
圖：Candy choi1026、食食食!
最優秀開飯火鍋店 (2016)
走入街市打邊爐？ 鮮入圍煮
香港人一向都鐘意打邊爐，就算係夏天都要開住冷氣一起烚下烚下！旺角呢間火鍋店裝修就扮到成個街市咁，有齊海鮮、肉同菜檔咁，即場揀靚料轉身就可以食個正火鍋。
唔單止裝修創新，最重要嘅湯底亦落足心思，其中一個特色湯底就係霸王卸甲火焰雞煲蟹粉鍋，剩係個名都特別有霸氣，其實即係花蟹同醉雞鍋，Highlight係中間有半斤蟹粉任點！唔想咁浮誇嘅話，又可以嗌濃厚原隻雞煲花膠湯，鐘意滋補嘅女士就啱哂啦。
圖：拍拖好去處、crystalting
最優秀旺角區開飯熱店 (2016)
無「老點」新派點心 老點點心竹筒飯
旺角長期都要排隊嘅新派點心店，睇店名就知道點心同竹筒飯都係招牌菜，唯一唔啱嘅就係，出品唔單止無「老點」，仲幾靠得住！
點心方面無少食客都會推介戚風班蘭馬孻糕，綠色特別Sharp之外亦重班蘭香味，質地鬆軟可口。鮮上肉響鈴腸粉亦足料，腸粉白滑、響鈴香脆、加埋豬肉豉油層次分明。海蝦肉餅竹筒飯望落去細細筒，其實都有成碗飯，肉餅厚身彈牙。選擇多而平均水平唔錯，難怪係競爭激烈嘅旺角區脫穎而出。
圖：olfooddiary
最優秀觀塘區開飯熱店 (2016)
文青至愛那些年Cafe 小時光
就咁睇小時光呢個名未必諗到，但睇埋英文名Scoool Cafe就應該估到係以學校為主題。而且唔係普通學校，而係台灣舊式校園主題，比你返去那些年，入班房食台灣菜！
提供嘅菜式都係唔少香港人熟悉嘅台灣美食，例如夜市香酥雞就有大大塊炸雞扒，雞扒厚切啖啖肉，啱哂食肉獸。台灣紅燒牛肉便當就有炆得入味嘅牛肉，送飯一流。唔單止主菜，飲品亦有相當水準，由台灣Feel嘅黑糖奶茶到近期最Hit嘅紫薯Latte都有唔少推薦。
圖：Catharinehui、KS52
全城人氣「卡通主題」開飯熱店 (2016)
Hea爆蛋黃哥要相機食先 YATA Gudetama Café by Izumi Curry
香港人平時唔洗急最緊要快，得閒都想Hea返下。唔知係咪因為咁而特別鐘意Hea到爆嘅蛋黃哥，連帶佢嘅卡通主題餐廳都特別受歡迎！
呢間本來賣日式咖喱嘅餐廳同蛋黃哥玩Crossover之後多咗唔少粉絲特別嚟餵飽相機，無論係溫泉蛋、糖心蛋、炒蛋定玉子燒都加上蛋黃哥嘅搞笑表情。而且唔單止係蛋，去到甜品連Pancake、芝士餅同奶凍都有蛋黃哥！加上餐廳裝修同餐具等全部都有蛋黃哥，手機記得叉好電先嚟開飯。
圖：crystyp、happyfukaday
全城人氣「芝士撻」開飯熱店 (2016)
香港人嘅平民芝士撻 批&撻專門店
芝士撻一定要去過江龍店大排長龍？未必，其實香港餅店都有出色芝士撻嘅！呢間連鎖餅店專賣特色批同撻，每次經過都會聞到陣陣香味引死人。
佢地嘅芝士鮮奶撻雖然就無半熟流心，但勝在芝士鮮奶餡甜度適中，入口幼滑又食到濃郁芝士同牛奶香。牛油皮撻底亦Keep到脆身唔油膩，少少牛油香更添層次。而且最重要嘅係價錢相宜，比唔少半熟芝士撻平一截，偶然芝士癮起嚟食一個就啱哂。不過注意撻皮比較脆，好易食到一地都係碎。
圖：bubeee、Pleure
想知全部得獎結果及頒獎禮盛況，即上：http://bit.ly/1Ogj2Jm
隨時接收最新資訊
讚好OpenRice專頁！