唔少人去西門町嗰陣，應該都有食過燒麻糬，即燒即食，熱辣辣，煙煙韌韌，外酥內軟，而且仲有好多種口味，講起又想食。而家唔使飛台灣啦，最近發現到荃灣地鐵站附近有間舖頭有得食呀！
呢間舖頭，一向都係做開外賣台式飲品生意嘅，抹茶布丁、熊貓抹奶茶因為抹茶味濃都幾受歡迎。所謂熊貓抹奶茶其實即係黑白珍珠，色唔同但味差唔多。
而佢哋最近仲引入咗西門町嘅燒麻糬，寫到明啲係由台灣空運過嚟嘅。麻糬有原味同抹茶味揀，而醬料就有成16款咁多，其中官方推介嘅就包括煉乳、花生、芝士、雙重抹茶、芝麻抹茶同黑糖抹茶。
由於即嗌即燒嘅關係，嗌完之後大約要等10零分鐘，有興趣嘅可以睇下佢點整嘅。店員會將條麻糬放喺燒爐上面，邊燒邊壓，燒到咁上下，就見到條麻糬開始變到漲卜卜同埋變色，但都未食得㗎。如果你係揀咗芝士味嘅，佢仲會後加芝士絲，再放上烘爐度烘到啲芝士變成熱溶狀態，加埋芝士醬就大功告成。而雙重抹茶嘅話，就會喺燒好後，再淋一層抹茶醬喺面。
睇個樣就好似好吸引嘞，麻糬都做到煙煙韌韌嘅感覺嘅，但又唔係好平均咁，有啲位食落硬硬地。而芝士呢，如果你部相機唔係食得太慢呢，你都仲可以食到拉芝，都仲可以點到下啲芝士醬嘅，食得到芝士嘅鹹香味，但就唔算話超突出。
至於雙重抹茶，雙重應該係講抹茶麻糬X抹茶醬嘅，但可惜抹茶麻糬嘅抹茶味比較淡，剩下嘅抹茶醬就甜甜地，如果佢可以再畀多少少醬，一路食到最尾嗰啖都仲可以醮到好多醬嘅話會開心啲囉。
籠町茶番
地址：荃灣青山公路荃灣段219號富華中心1樓3C號舖
文：Kar
最新飲食潮流：
行便利店有新發現 20cm長薯片X新出抹茶雪糕
超豪華珍寶龍蝦刺身丼 到底有啲咩？
邪惡五層芝士包期間限定口味全新登場
隨時接收最新資訊
讚好OpenRice專頁！