【3月自助餐推介】（二）朱古力世界

香港人幾時都咁鍾意食自助餐，又幾時都咁鍾意食朱古力，今次呢間酒店將兩大元素合而為一，推出咗個朱古力系嘅自助晚餐，由主菜到甜品都有朱古力嘅成份，仲唔開心死你哋？

朱古力莎樂美腸

平時食莎樂美腸就食得多，一片片充滿鹹香，不過溝埋朱古力一齊整變咗朱古力莎樂美腸就真係未試過。仲要係用M&M同麥提莎兩款朱古力嚟整㗎，另外再加松子同牛油，整完之後除咗隻色變咗朱古力色之外，個形同原本嗰啲又幾似，不過食落就當然係甜啦。

朱古力香蕉忌廉芝士薄餅

世人已經唔可以阻止朱古力入侵食物嘅世界，連Pizza都係朱古力！喺餅皮上面搽咗層朱古力榛子醬冋忌廉芝士，上面再有些微烤過下嘅香蕉同士多啤梨，材料唔算好多但係食落嘅層次就好豐富，尤其是香蕉同士多啤梨都係生果入面同朱古力係最好朋友嘅，味道夾得嚟仲有啲似食緊甜薄餅。

Amedei 9號朱古力拔蘭地蛋糕

到介紹返真正嘅朱古力甜品，就一定要講一講呢個Amedei 9號朱古力拔蘭地蛋糕！唔講唔知你知唔知，Amedei 9號原來係意大利一個貴價品牌嘅黑朱古力，仲要拎過倫敦朱古力學院嘅「金豆獎」！有幾金？總共搜羅全球9個國家唔同品種嘅可可豆，再用咗9種唔同焙燒方法炮製出嚟㗎！淨係睇在呢個配方已經好吸引啦，大廚仲要將佢混埋拔蘭地酒一齊製作，甜中帶有一點甘苦嘅黑朱古力蛋糕再滲出酒香，冇得輸！

其餘嘅朱古力製品仲包括有朱古力意大利麵配白朱古力酒、朱古力藍莓棉花糖意大利三文治、香煎白朱古力玉桂多士等等，隔住個mon睇相都好聞到啲朱古力香呀媽咪！

詳情：
餐廳：尖沙咀凱悅酒店咖啡廳 Cafe
電話：3721 7700

文：Kar

隨時接收最新資訊
讚好OpenRice專頁！