已經有幾百年歷史嘅盆菜，以前多數係用木盆載住啲嘢食嘅，而家就用金屬盆或者陶瓷盆多喇。雖然話盆菜嘅用料冇咩特別定，都係大雜燴嘅菜式，豐儉由人，但係點樣放啲嘢食呢，就都有少少規矩嘅：一層一層由上至下、由貴至平整齊排列好，上層會放啲又貴又要食先嘅嘢，即係好似大蝦呀、雞呀、海鮮呀咁，而最底層就當然會擺啲索汁嘅豬皮、蘿蔔之類啦，由頂層食到尾。而盆菜原本其實係新界圍村原居民嘅傳統食物，不過而家已經發展到好多地方都有得食，仲延伸咗好多款式出嚟添：
川味麻辣盆菜 臥龍莊
辣辣盆菜邊個食？無辣不歡嘅朋友，今次應該好歡喜了，呢個川味麻辣盆菜係用正宗麻辣醬汁秘製，如果仍然覺得唔夠辣嘅，仲可以要求加辣！到時啲鮑魚、青口、豬皮、蘿蔔、枝竹等等吸晒啲辣汁精華，就真係old food is so excited喇。不過，首先你要有幾個同你一樣咁食得辣嘅朋友先！
預訂日期：即日起至2016年2月26日（只限外賣，需於取貨前兩天預訂）
電話：2377 2022
素食盆菜 AEON
一般嘅盆菜通常都會包括魚蛋、蘿蔔、魷魚、雞同炆豬肉等等，而食素嘅朋友仔就只能夠得個睇字。而家就可以食埋一份喇，事關AEON推出咗個「新春素盆菜」，材料包括素雞、海鮮豆腐、珍珠筍、藕片同西蘭花等等，清清地，就算唔食素嘅朋友想食得健康啲，都一樣啱食。講開又講，佢哋另外仲有原隻鮑魚盆菜同埋海味盆菜㗎，見住大大隻鮑魚同埋啲海參、海螺片，就好想一嘢夾落去……
預訂日期：即日起至2016年2月17日（只限外賣，需於取貨前五天預訂）
網址：https://bid.aeoncity.com.hk/punchoy/
農家風味盆菜 龍華酒店
盆菜口味發展得太多，反而好少地方可以食得返最正宗嘅味道。話說最正宗最傳統嘅盆菜係必定會有門鱔乾呢種材料，用門鱔乾嚟燜蘿蔔會更加入味，絕對係成盆盆菜嘅精髓。而呢兜農家風味盆菜除咗有門鱔乾之外，亦用乳鴿代替平時食開嘅燒鵝、燒鴨，仲有鴿蛋食添，呢幾款食材，都好少可以喺出面其他地方食到嚕。
預訂日期：即日起（堂食、外賣均可，需於取貨前一天預訂）
電話：2691 1594
一人盆菜 金禾茶餐廳
(Photos by 陳真)
新正頭想有霸氣啲嘅，可以一人一盆盆菜咁食。係呀，一人一盆。不過唔使驚食唔晒，講緊嘅係呢間灣仔茶記嘅一人份盆菜啫。但呢兜盆菜細細兜但都有成8款材料：時菜、豬皮、蘿蔔、鹽焗雞、燒鴨、燒肉、土魷同鯪魚球，再配埋個飯同例湯其實都幾飽，即叫即做相當新鮮，啲燒肉層皮仲係脆㗎，而鯪魚球亦都輕輕炸過一炸。呀，細細聲話你聽，呢個盆菜其實一年到晚都有得食。
文：Kar
隨時接收最新資訊
讚好OpenRice專頁！
Keyword
盆菜
新年
麻辣
鮑魚
素食
Copied to Clipboard