2017年度「亞洲50最佳餐廳」頒獎典禮日前喺曼谷完滿結束，當晚亦公佈咗完整名單。除咗香港有七間餐廳上榜之外，港人旅遊熱點日本、新加坡同泰國都各有九間餐廳入選，另外台灣等地亦有代表，開飯仔幫大家精選咗以下七間得獎餐廳，用OpenRice app Bookmark哂，咁就可以一app在手食勻亞洲各地區！
 

由全球首屈一指嘅天然礦泉水品牌 S.Pellegrino同Acqua Panna全力支持，亞洲50最佳餐廳由2013年開始舉辦，現今已經成為亞洲區最具代表性嘅飲食指南之一。評審由超過 300 名亞洲食評家、廚師、餐廳東主同備受推崇嘅美食家組成，佢地會根據過去18 個月到訪餐廳嘅用餐體驗排出自己嘅順序。
 

亞洲最佳餐廳　　Gaggan （第1位）

能夠連續三年擊敗全亞洲其他餐廳登上亞洲最佳餐廳寶座，曼谷Gaggan靠嘅係主廚Gaggan Anand以當代技術重現傳統印度菜餚嘅創意，例如呢道招牌菜Yoghurt Explosion with red matcha and charcoal就加入日本風格同分子料理技術，令食客有耳目一新嘅體驗。

新加坡最佳餐廳　　Restaurant Andre（第2位）

今年排名上升一級到第2位同時再次蟬聯新加坡最佳餐廳榮譽嘅Restaurant Andre由台灣首位得到米芝蓮認可嘅主廚江振誠主理，供應南部法國菜。最大嘅特色係以主廚獨創嘅八角哲學為主，呈現糅合東方元素嘅出色法國菜。

日本最佳餐廳　　NARISAWA （ナリサワ）（第6位）

連續兩年奪得東京米芝蓮二星肯定嘅NARISAWA，今年亦係第五年成為日本最佳餐廳得主。主廚成澤由浩唔單止將日本元素融入法國菜當中，而且佢亦係一位環保人士，因此餐廳唔單止以大自然為主題，菜式亦以森林、泥土等命名。

最佳新晉餐廳　　Odette（第9位）

今年名單上面有10間新餐廳，係記錄以嚟最多，當中新加坡嘅Odette一上榜就進駐第9位，亦係榜單有史以嚟排名最高嘅新晉餐廳。餐廳由主廚兼東主Julien Royer喺新加坡國家美術館開設，供應以亞洲風格作靈感嘅現代法國美食。
 

最佳進步獎　　Locavore（第22位）

位於峇里島嘅Locavore今年躍升27位，而且亦贏得印尼最佳餐廳嘅美譽。餐廳供應歐洲印尼Fusion菜式，堅持只用可持續採購嘅當地食材，部分香料同蔬菜甚至係自家菜園有機種植。Menu更有locavore同素食herbivore選擇，非常貼心。
 

台灣最佳餐廳　　RAW（第24位）

台灣今年有3間餐廳上榜，當中RAW由去年第46位提升到第24位，而且亦係名廚江振誠返台灣開設嘅第一間法國菜餐廳，難怪被唔少饕客稱為全台灣最難訂枱嘅餐廳！同新加坡Restaurant Andre唔同嘅係RAW結合咗24節氣同台灣當地食材，充滿新鮮感。

菲律賓最佳餐廳　　Vask（第35位）

馬尼拉嘅Vask再度蟬聯菲律賓最佳餐廳，餐廳秉持獨特嘅飲食人類學，同當地農夫同漁夫合作以得到最新鮮嘅當地食材。而且餐廳由裝修到菜式設計都糅合咗人文、自然、歷史、科技等元素，令食客可以用味蕾遊走菲律賓一趟。
 

其他值得一試嘅餐廳仲包括曼谷嘅น้ำ (Nahm)（第5位）、東京嘅龍吟（第7位）、台中嘅樂沐法式餐廳（第28位），同大阪嘅ハジメ（第34位）等。
 

用OpenRice app就可以輕鬆切換唔同地區（左圖圖示），同時Bookmark定心水餐廳（右圖圖示），咁就可以食勻亞洲唔同地區嘅最佳餐廳啦。
 

按此瀏覽2017「亞洲50最佳餐廳」完整名單

圖：Asia's 50 Best Restaurants
文：Cathy
 


開飯編輯推介：

1. 【專訪】日本人在香港 開餐廳最重要健康行先

2. 1月份好評餐廳十強

3. 2017年港澳版米芝蓮指南

熱門文章推介：

1. 【一個人開飯】一個人喺大埔食乜好？

2. 【熟食中心尋寶】堅尼地城士美非路熟食中心

3. 【開飯教煮】網上人氣甜品店師傅示範朱古力慕斯

隨時接收最新資訊
讚好OpenRice專頁！