利星火鍋海鮮小炒

Open Now

Now Closed

之前係Youtube 見名廚Ricky介紹，見到好似幾吸引，之後終於約左朋友去食。一出地鐵站就係，非常方便。我地之前book左位，不過就安排左一個角落位，頭頂咁岩係抽氣扇位，吹晒D熱風出黎，因為太熱，所以同伙計要求換枱，伙計二話不說幫我換枱，態度值得一讚，係唯獨有個大叔唔知係聽覺差定係本身慢活，要叫好多次先聽到。D 小炒水平冇令人失望，個招牌冰梅欖角骨好惹味，杏汁豬肺湯好夠味，冇畀杏汁搶晒D肉味，椒鹽九肚魚炸皮上枱時依然脆口，炒蜆冇沙多肉，個啫啫唐生菜煲八面更附送了兩隻蝦。唯一缺點就係環境太迫太嘈，枱與枱之間好迫，果晚咁岩隔離大枱坐左十人慶生，聲浪太大，我同朋友完全傾唔到計。不過整體係性價比高既，不妨一試。

4個女仔約去深水埗搵好嘢食，朋友力推呢間，我一直以為係打邊爐，去到先知原來係食小菜😅 餐廳鋪面唔係好大，但係環境好乾淨，我哋四個人坐圓枱，好闊落，叫多幾碟野食都唔怕🤭招牌芋香卷 ⭐️⭐️⭐️⭐️朋友係為咗芋香卷嚟呢度，不斷推介我地一定要試！大大舊芋頭表面炸到脆卜卜，沾上隨碟嘅酸甜汁，咬落粉粉地但又好香口，鍾意食芋頭一定要試吓👍🏻乾隆生菜包 ⭐️⭐️⭐️⭐️⭐️食法同泰式生菜包一樣，入面嘅肉係豬肉，最驚喜係加入大量蟹籽，食嘅時候脆卜卜，令到口感多咗層次！招牌杏汁墩豬肺 ⭐️⭐️⭐️⭐️電話訂位嘅時候問我地駛唔駛訂豬肺湯，見佢咁力推所以梗係要試吓啦！杏汁味好濃好重，豬肺洗得好乾淨無內臟味，鍾意飲豬肺湯嘅一定唔可以錯過～ 冰梅欖角骨 ⭐️⭐️⭐️⭐️⭐️每次食中餐都會揀一道「骨」，今次揀咗餐廳推薦嘅冰梅欖角骨，話梅味食落好特別，酸酸甜甜好啱送飯，份量唔少但我地都清晒👍🏻 飛天芥蘭煲 ⭐️⭐️⭐️⭐️⭐️芥蘭煲好正呀！好鍾意上枱時嘅沙沙聲，雖然係飛天但絕對唔會太辣，醬汁濃郁，芥蘭亦軟硬適中，五星好評✨椒鹽九肚魚 ⭐️⭐️⭐️喺九肚魚同魷魚之間掙扎咗好耐，最後揀咗九肚魚😁 九肚魚好滑，脆漿唔會太厚，外脆內滑好好食～

深水埗想揾好野食，話難唔難話易唔易，因細佬生日又唔想食普通野，好彩老公介紹呢間餐館，入到去餐館見到店內的相片，才記起老細是誰，大家可能都未必記得無線之前做十兄弟飛天五是誰，他原來是這餐館的老闆。我們坐下後便點了“杏汁燉豬肺湯“、“ 冰梅欖角骨“、“ 芥茉牛柳粒“、“ 海鮮大全糯米飯“、“ 招牌鐵板火焰聖子皇“、“一柱擎天“。當然首先嚟個豬肺燉湯先，真的要用四字形容“滋味濃郁“值得一讚， 第一道餸上場“ 一柱擎天“， 真是物如其名地上枱，不單是樣子特別，連菜都非常鮮嫩, " 冰梅欖角骨" 都非常惹味， 主角出場了， 就是“招牌鐵板火焰聖子皇“， 點解叫主角因為有得食有得睇， 出場時會用酒灑上鐵板上起了紅紅的火滔， 好配合個菜名呀！至於“ 芥茉牛柳粒"味道適中，風味獨特! 壓軸主菜出場就係“ 海鮮大全糯米飯“，用油炸過的蟹放落飯上蒸， 有另一番風味， 可算是色香味俱全! 一頓豐盛嘅晚餐後， 還送上精美鯉魚形的桂花杞子糕， 最後配上的甜品，香與甜互相交融貫通，確實是味蕾的最大滿足， 餐桌上的享受可劃上完美的句號。

我好喜歡吃中菜，尤其夠鑊氣的小炒更合我心意。這次朋友介紹到深水埗一試這間利星火鍋海鮮小炒，沒想到位置如此方便，在深水埗D2出口向右行便到了！有兩層高，平日夜晚一樣坐滿人，超級多客呢！足料的老火湯，杏汁燉豬肺湯，這張相片已經是喝到尾聲了，因為太美味，所以來不及相機先食＝ｐ什錦煙肉大盆花菜，這真是非常驚喜的一道菜，我吃了很多很多椰菜花，這樣煮椰菜花很新穎，而且味道一流，這道菜甚至有本事到令不愛吃菜的先生都說好味啊！當然，其他配菜，如臘腸等也非常入味！鐵板火焰蟶子皇，侍應會在蟶子上點火，因為一切來得太突然，我只拍到「無火的一剎」＠＠蟶子皇好大隻，啖啖肉，但要留意，酒味會比較濃啊！這道三蔥炒蟹蒸燸米飯超正！我本身特別喜歡吃燸米飯，也愛吃蟹，兩樣喜歡的食物混在一起，更是滿足！蟹夠甜鮮，也多膏，蟹汁混入燸米飯，令飯變得更香口惹味，我添了一碗又一碗呢！整體來說，食物質素非常高，而且有很多新的菜式，讓愛吃小炒的朋友有新鮮感，而且吃小炒就是要夠鑊氣，這裡的食物樣樣都鑊氣十足，完全滿足到小炒Fans的胃口呢！下次一定要再跟朋友來！

今日與幾個好友想揾地方食個晚飯聚一聚，友人咁啱向深水埗附近返工，大家就研究下食邊間先，上OpenRice 見到「火焰聖子王」好吸引呀，就食呢間啦用冰梅醬炒腩排，味道少少酸，好淋呀聖子到⋯⋯，大家都好期待鐵板聖子王上枱，上枱時淋上酒，火焰升到高過我個頭，好震撼🔥椰菜花、大蝦乾好好食呀，濃味又夠辣是日孖寶(雜錦大盆花菜+三葱炒龍蝦)$328，加配糯米飯做底，都只係加$100👍🏻食完龍蝦糯米飯後，大家仲好似意猶未盡，就立即向OpenRice 搜尋小菜，見到有其他食家推介「黃金棒棒蝦」，好啦！就呢個吖，唔該上枱一刻，原以為平平無奇的，但第一啖食落去：嘩！好好味呀，鹹蛋黃足夠鋪滿每一隻蝦，夠嫩滑，我忍唔住連蝦殼都食埋(真係食得架)最尾「鯉魚桂花糕」做 Ending

鍋氣小炒不嬲都有一定粉絲，我也是其中一個。深水埗小炒特別多，今次就約咗三五好友去試利星聚舊食餐好嘅！一入去就喜歡它光猛闊落，大聲啲都唔使驚嘈到隔離。眼見餐牌所有人氣菜式都有大大張圖片，未叫已經好想食。咁梗係隨即叫老闆介紹幾款特式小菜啦！最後六個人叫咗六個餸。今次最驚喜居然係雜錦大盤花菜，可能本身好鍾意食椰菜花，師傅炒得入味又爽口，加埋香口配菜，簡直要美人照鏡。其他菜式當然都有一定水準啦！我已經諗定下次要試吓佢啲自家燒味！

新年後跟好友相約食開年飯當然要選比較中式的餐廳!所以我們選擇了這間位置方便的利星火鍋海鮮小炒~深水埗地鐵站D2出口一出往右手邊看就可以看到招牌了~因為，我們一行6人所以可以叫很多小菜來試~# P.S. 註明【時價】的價錢一律均為本人惠顧當天的時價，因此僅供大家參考而已首先，由於天氣寒冷所以叫了老火靚湯~足料又夠味的《杏汁燉豬肺湯》$188還有以下幾樣小菜：《招牌麗香卷》 $86簡單說味道跟竽頭卷一樣喔~《冰梅欖角骨》 $88味道酸酸甜甜的很開胃，配飯一流《什錦煙肉大盆花菜》 $88值得推介，雖然味道有一點點咸~但這道菜有很多配料而且很入味!特別是那個椰菜花，食下去要軟硬度剛好很不容易，而且還很入味呢!海鮮方面只點了2樣~《鐵板火焰蟶子皇》 時價 (當日為$68/隻)即場表演，如果沒有準備好真的會嚇一跳!燒過後的蟶子更加看味十足~最後一定是這個主角《三蔥炒蟹蒸糯米飯》 時價 (當日為$588)超足料，而且超級多蟹膏呀!原本看圖片就很吸引~雖然是有點貴啦~但看完實物後真的覺得很值得一試啦!要是來這裡吃飯的話，請一嘗這個糯米飯啦~很推介喔^^

利星小炒做得如此出色, 道道菜都新鮮精心烹調, 必定成為我與挈友談天說地的另一飯堂。值得推介! 黃金蝦上咸蛋黃極盡惹味, 如為鮮蝦披上黃金衣,炸得連殼都脆卜卜，佐飯一流。冰梅欖角骨甜酸度適中, 完全靠冰梅的酸甜味帶出豬肉鮮味, 豬肉用料上乘半肥瘦適中, 必食推介。蒜蓉粉絲蒸鮮尤看似平平無奇, 越簡單菜色越能試出利星誠意, 鮮尤好新鮮,蒸既火喉剛剛好, 尤魚幼嫩鮮甜，不消一會兒便清碟。脆炸大腸配甜酸汁, 送酒一流, 大腸清潔得好徹底, 外皮脆得像吃薯片一樣。胡椒大蜆煲, 胡椒蜆湯熬得像鮮奶一樣, 濃郁到不得了！喝完即時暖和身體, 用上如排山倒海般份量的大蜆, 真材實料!火焰鐵板蟶子, 只有在利星才吃到, 將半熟蟶子放在熱燙的鐵板上, 滋滋聲不斷, 再由伙記淋上美酒, “逢”一聲將蟶子燙得剛剛熟, 視覺味覺之終極享受, 現在仍回味當中!