Yummy (Closed)

前排係旺角東睇完戲就直接行咗落旺角廣華街覓食，咁巧合見到呢間Yummy，太肚餓嘅關係就入咗去食個晚餐。見到佢個Dinner Set都唔算太貴，所以兩個人各自揀咗一個晚餐，之後互相Share。最後我地柯打咗個「黑墨汁鮮魷意粉」同「加拿大波士頓龍蝦拼軟殼蟹配黑松露薯條」。晚餐都分別有餐湯、雪糕同飲品，個人覺得咁樣價錢都幾合理。坐睇傾下計無耐，先到嘅係餐湯同飲品，是日餐湯竟然係黑松露忌廉磨菇湯，睇泥我今晚同黑松露都幾有緣。湯嘅味道調配得宜，散發出濃濃黑松露味，令人食慾大增。出餐速度頗快，飲完湯無耐兩個主菜就到。半隻龍蝦加軟殼蟹，炸至金黃襯熱食，覺得太油膩更可以配搭埋個黑松露醬去食。講個有趣嘅誤會，本身眼見餐牌所寫黑松露薯條，以為係偏幼身薯條用黑松露油炸個款，誰不知一到發現係大薯角。雖然覺得幼身薯條會香啲會好食啲；但薯角都唔差，因為大份又大件夠飽吖嘛。另外墨汁意粉嘅水準出唔錯，除咗意粉入味之餘，麵芯嘅熟透度做得岩岩好，有嚼勁同口感。另外鮮魷都係煮得剛好，所以外面爽內裡軟。超出預期所想，值得推薦。最後，非常完整地食埋個甜品，牛奶雪糕作結整個晚餐。總結，價錢唔算太貴夠飽，環境都坐得舒服，不俗。

身為一個槍迷既我，得閒就會去行下槍街睇下槍，行到肚餓就好自然係附近搵下嘢食，係門口睇咗陣餐牌覺得幾吸引，就決定入去試下。入到去再諗下食咩好，最後同朋友決定叫兩個set dinner，分別係黑墨汁鮮魷魚扁意粉同加拿大波士頓龍蝦拼軟殼蟹配黑松露薯條。一開波就嚟咗個蘑菇湯，香菌味好濃。之後就到主菜既時候，黑墨汁鮮魷魚扁意粉好夠味，好食既嘢自然好快食哂，雖然會食到成口黑哂，但最緊要好食，而加拿大波士頓龍蝦拼軟殼蟹配黑松露薯條，我只係食咗少少薯條，個黑松露醬好香濃同薯條好夾。最後就係雪糕一個，雖然有啲簡單，但都算係一個好食既雪糕，下次再嚟會試下佢啲甜品，因為個賣相好似幾吸引。