匠心廚房 (Moved) New Location

最近多了在屋企附近食店食飯，前幾日就去了美孚匠心廚房食飯。親切的店長告知原來老闆以前是酒店大廚，一直醉心研究特色美食，所以開設此店跟食客分享他的用心製作。這裡以粵菜為主，京川滬為副；菜式及環境則以現代中餐的簡潔和優雅爲基石。食物價錢介乎HKD38～HKD168，街坊價，可接受！川蜀口水雞 (HKD58)肉質嫩滑，辣味夠香夠惹味，伴飯一流，嗜辣的可要求加辣。欖豉蜜餞焗肉排 (HKD88)一口一粒，肉質鬆化，酥香味美，食完一粒再一粒。拍蒜醬油豆角 (HKD58)送來時蒜香撲鼻，豆角由醬油包著，跟拍蒜互相輝映，我鍾意食香口的拍蒜，而老豆則愛食豆角。招牌雪菜龍躉麵 (HKD88)碗麵好大碗，內有6塊龍躉魚塊，魚皮膠質豐富，煙韌彈牙，無骨啖啖肉，魚湯鮮甜，一問之下，原來個湯用了幾種蝦、蝦米、龍躉魚骨等煲足幾小時，唔怪得咁鮮甜啦！(左) 靈芝山楂烏梅茶 (HKD18)入口酸味味，消滯解渴。(右) 銀耳無花果薏米水 (HKD18)超級足料，清甜潤喉。雙色布甸杯 (HKD38)這是老闆用心設計的甜品，上層有新鮮酸甜芒果粒，下層有芒果加雲尼拿布甸，香滑少甜而不膩，作飯後甜品真不錯。

新開既食店，見菜式獨特，價錢都合理 (太平又怕低質，太貴又怕唔抵)六點晚市一開就嚟，即刻被安排入座旁邊梳化位。冰涼既拌菜，螺肉清爽彈牙，有青瓜同蟹籽點綴，好清新。略嫌沙律醬太多太甜，係味道上有點霸道。老闆娘送上麵後叫我地先趁熱飲咗個湯先，湯用鮮魚煲，淡淡奶白色。麵質唔太淋好好食，而龍躉約有6-7小片，魚肉爽口新鮮，非常喜歡。起初以為椒鹽會係乾身D，原來都有配菜同少少汁。雞亦炸得幾香口，整體好惹味。但8件單骨即係4件雞翼，而且當中有D較細隻，所以感覺偏貴。煎蛋角好家庭FEEL，蛋煎得香而內裡仲保留到少少半生熟，好好食，但蠔仔蠔味唔算突出，肉碎份量亦唔多，係肉眼見到而食唔出既肉碎，如果足料D會更好。最後老闆娘誠意推介既甜品，芒果屬清同椰汁一樣唔太甜，擺盤都好靚，將平時無乜美感既芒果糯米飯提升。味道、環境、服務都尚算滿意，菜色選擇係同區嚟講算好有特色，餐牌清楚分類，容易搵到啱食既菜式。唯獨係哩個價錢會期望用料/份量多少少，或者出二人餐/四人餐，可以一個更經濟既價錢去試更多菜式。