巴依餐廳

Open Now

Now Closed

巴依餐廳係港大附近的老牌羊肉店，名氣鼎盛，店員唔憂做。試完之後覺得質素平平，決定為民除害😀平日傍晚6:15pm黎到，已有唔少枱客，夜啲仲需要排隊。今次都試咗唔少菜式，味道不驚艷，價格偏高，甚至乎坊間的羊肉店質素亦比佢好。烤羊腿 $368（需預訂）賣相吸引，但食落完全唔掂😢好似煲湯肉咁鞋口。羊什湯 $150普通，多羊什，冇乜羊味。酸辣土豆絲 $58土豆絲爽口，但酸味過重，搶晒辣味。羊肉薄皮包子 $180所謂羊肉包子，即係羊肉餃，一籠15隻。算係所有入面最好食嘅，羊肉味比烤羊腿重，有唔少湯汁。唯獨麵粉皮整得唔太好食。新疆拌麵（細）$60其實份量都唔少下，性價比高。麵條幾彈牙，唔錯。但味道略嫌不夠濃，有啲到喉唔到肺。同埋竟然係配豬肉而唔係羊肉😂酸奶 $30呢個OK，偏酸，鍾意乳酪嘅人可以一試。杏仁羊奶凍 $30細細盒，又唔好食。完全冇羊奶味，普通杏仁布甸一個😂

自從三年前去過北彊旅行就一直對新疆烤羊念念不忘。巴依係一間我嚮往嘅餐廳，難得週末有時間，於是就一家四個羊痴齊齊去食羊肉一嚐心願。Dinner 訂咗七點半，去到時餐廳外已經有好多人等位，而且講普通話嘅人居多，相信係因為香港人對羊嘅接受程度不及國內同胞高。畢竟係米芝蓮推介嘅餐廳，如果冇訂位都唔使旨意等得到位。餐牌上嘅選擇唔多，價錢亦都非常親民。我哋訂位時已經預留烤羊腿。因為鍾意食羊，侍應亦都介紹手抓羊同羊湯，四個人食其實已經非常足夠，但係難得嚟到呢間餐廳，梗係會試其他菜式，於是乎就要咗涼拌豆腐，酸辣土豆絲等。我老公話冇米飯唔得，所以仲嗌埋新疆拌麵，飲品方面我哋就要咗三杯酸奶。第一道上嘅係涼拌豆腐。嘩，好好味呀！呢個豆腐刀工好，加埋皮蛋同榨菜絲，味道一流。跟住上嘅係我哋期待已久嘅烤羊腿。真係唔知點樣形容嗰個好食法-啲羊腿非常脆皮，羊肉極之好味，沾上孜然粉，完全係新疆嘅味道。下一道上嘅係手抓羊，其實就係原汁原味嘅羊肉。大大件羊肉對於我哋啲羊痴嚟講，睇到就開心，當然亦都充份滿足咗我哋的口慾。只係因為有個對比，所以覺得都係烤羊腿好食啲，下次再來就唔會兩樣餸一齊嗌，今次係我哋太貪心了，所以有少少失策