餃子縣餃子專門店 (Closed)

旺角成日咁多人，夜晚突然想坐低食嘢搵位都幾難，加上我又唔想吃太飽，朋友提議食餃子。椰菜木耳豬肉餃 $58見到佢有得揀純餃子，我就叫咗嘅菜肉湯餃。原來一碗都幾大碗，餃子隻隻超大隻，裡面豬肉同菜比例都幾均勻，因為菜好爽，增加了口感 唯獨係我覺得個湯鹹咗少少。煎餃+酸辣湯 $62酸辣湯份量仲驚人，超足料，最好係有好多滑豆腐，令碗嘢加咗少少清淡之味，本身酸辣味都好足，連朋友食到辣都係咁流鼻水，而且切絲都切到粗幼適中，呢個價錢絕對交到功課。佢個餐有跟多幾隻煎餃，脆就夠脆啦，只係太過油，未必個個接受到。

上次食過一次，覺得好味，今晚係旺角睇完戲，唔太餓又想食少少野，所以黎食餃子。店面雖然細，用白色同淺色環境加光猛既燈製造空間感，坐落舒服D。枱細，所以就筷子、碟、餐牌放係層架，方便食客。為免袋撞袋，枱底有個小鈎比人掛袋。個碟分兩格，一格放餃，一格放醋。淨係叫左一碟冰花「餃子樂園」。即叫即整，所以都等左成五分鐘。上到枱，餃子熱辣辣、個冰花底脆卜卜，D饀幾足，幾鮮味，正！十隻餃，隻隻唔同味，岩晒有選擇困難症既朋友。日式紫菜豬肉餃，紫菜味原來好襯餃子，出面未食過。香菇粟米豬肉餃，粟米好甜，好味。三重芝士豬肉餃，一咬落去，噴汁，整污糟左條裙，下次食要小心D。平時都食到少少辣，但個泰式香辣豬肉餃對我黎講，太辣，食唔到。一間小店，做到咁多心思，好有誠意。下次要黎試下小食。