紫荊閣 (Closed)

Bauhinia Kitchen

141 Reviews

Taste

Decor

Service

Hygiene

Value

3354

Hung Hom

$201-400

119

水晶鮮蝦餃

5 Recommended

$42

奧志雷

Level4

2.1K

Read full review

恭喜公司老佛爺生姐榮休，順便 Annual dinner 同 farewell party 一次過。自攜紅酒要開瓶費每支 $50 蚊，太孤寒搞錯呀﹗仲要無免費停車場，另外如要麻雀的話要收 $500 蚊張！晚飯不包雀局。望顧右盼觀察四周食客檯面上食物，幾檯都食荷葉飯？招牌菜來的嗎？向經理查詢一下，原來係叫化雞、乞衣雞，不是飯來啊！而且紫荊閣並沒有出品荷葉飯，極為失望。

Meaume 2013 紅酒，依隻太淡太薄不喜歡，不過女仕們就喜歡喎。Pascaud 2013 紅酒，依隻法國產地好一點點，夠厚夠濃微香。晚宴食功夫、食技巧、食觀感、食風味，色香味中規中矩，不過不失。餐牌猜燈迷，另類娛樂，有趣有趣，我叻叻都估中八成多。桂花炒魚肚，芽菜花膠絲炒蛋？龍川鳳翼，雞腳雞翼？金銀帶子，彩椒炒帶子？金華玉樹斑，時蔬蒸斑仔？法海蒲團，法國肉蒲團？髮菜瑤柱節瓜圃？乾草菰煀雞，草菰炆雞？上湯煎粉果，炸粉角浸雞湯？

龍馬精神，聯想唔到係茄汁煎大花蝦喎。煎到太老過熟鞋烚烚乾爭爭，沒有彈性而韌韌的。大大隻都夠睇面，不過無鮮蝦味無鮮甜味。陰沉雪藏大蝦味道，食其茄汁味罷了，甜笠笠不喜歡。淮杞花膠仔燉雙鴿，無左個湯字既？不過都估到係湯。何來雙鴿呢？用兩雙鴿燉還是用兩種鴿燉？還是一公一乸呢？驚喜的味道，特濃香甜味美！縱使有同事覺得淡口，但我真心感到湯汁濃郁清甜無比，黏黏膠膠好舒服。花膠桶爽爽的，老鴿已燉到完全透徹，一夾骨肉分離，鴿肉味依然，質地嫩嫩，不用點豉油都非常夠味。

桂花炒魚肚，百份份答中係芽菜花膠絲炒蛋！肥大的芽菜不腥嗅，連我討厭芽菜的都能大把大把地掃入口。清香爽甜多汁，處理得宜。夾雜炒蛋咸香都幾好食，完全食唔到花膠絲喎。金銀帶子，估中一半彩椒炒帶子，原來還有吉列帶子及西芹呢。即是翡翠彩椒炒鴛鴦帶子，有創意我鍾意。爽甜的西芹紅椒黃椒，清新好好味呀！搶住食，食到唔停口。巨形澳洲帶子，內外全熟還泛著鮮帶子味道，質地結實有彈性。帶子味濃散發微量海水咸香，不需要添加蠔油已夠美味。再來吉列帶子，剛剛炸起仍然熱辣辣，咬開輕煙飄飄，炸得乾爽外脆內嫩，不乏肉汁，香噴噴啊！

乾草菰煀雞，真的是草菰炆雞，其實是金針雲耳黃酒蒸雞的變奏。夾件雞髀試試，味道百份百係黃酒蒸雞。鬆軟的雞肉，大肥雞充滿厚厚肥膏，咬掉才繼續吧！雞件略有煎過才掉入煲炆，平凡住家菜的風味。龍川鳳翼，我仲估係雞腳併雞翼，迷底終於解開喇 ﹗原來係金華火腿釀雞中翼。龍川如何演繹呢？墊底既芽菜像河流？還是金華火腿穿過雞中翼呢？依道菜原本第三位，見遲遲都未出場都覺奇怪。本應跟著桂花炒魚肚後面，可能連續兩味都係芽菜，觀感不良好掛。兩道菜的芽菜均炒得香甜味美，不苦不澀無草青味，師傅炒功了得，讚！雞翼烚到過熟，乾硬鞋沒有半點嫩滑感。金華火腿有否先蒸得柔軟先釀入去架？過咸硬掘掘，合體失敗，並無完全融為一體，雞還雞，腿還腿，不喜歡。

金華玉樹斑，依道菜估時蔬蒸斑仔，錯晒！清蒸麒麟斑現真身，滑滑味濃巨形冬菇片，厚厚嫩嫩斑球，薄薄咸香金華火腿。一齊食味道恰到好處各補長短，但分開食的話，缺點盡顯啊！斑球散發輕微腥味，金華火腿只咸不香，幸好冬菇可口及菜芯爽嫩甜美。工序繁多，試出大廚功力，辛苦了。法海蒲團，法國肉蒲團出現喇﹗不是髮菜瑤柱節瓜圃，素齋類黎喎。一小篤髮菜，齋鮮竹卷，生菜墊底，埋個蠔油芡。清清淡淡，味道單調，靜蠅蠅平凡一般唔難食。

上湯煎粉果，炸粉角浸雞湯，跟咸水角沒大分別，史雲生清雞湯加韮黃。蓮蓉西米焗布甸，清爽甜味不過份，連不愛甜的我都接受到，味道蠻不錯。白蓮蓉嗎？較似奶黃，似雞蛋布甸呢。揚州鍋麵，假爽蝦球、淡味叉燒、軟滑雞柳、厚彈冬菇，菜芯爽甜比所有食材都好食。腍腍軟軟的麵質，全蛋麵味道已溶入高湯。平平凡凡穩穩陣陣無驚喜，大家合力消滅掉。

椒鹽鮮魷，新鮮炸起非常香口！金黃鬆脆不硬掘掘不油膩，肉質都爽脆，魷味甜美，淋上喼汁更醒胃。蟹子蒸燒賣，噴晒煙出場甚有氣氛，蒸得水潤立立令，十分吸引又期待。巨形到跟牛肉球一樣的呎碼，未能一口塞入，狠狠地大啖一咬。嘩嘩嘩，燙到颷眼水呀﹗不過越熱越高興，越熱越好味道。在口內吹一吹，緩慢地嘴嚼，結實的肉球，每口充滿肉汁，豬肉味濃厚香甜，沒半點腥嗅。還有蟹子陣陣飄香，滿分堅好食喎。

水晶鮮蝦餃，高質手藝，半透明的誘惑，若隱若現。充滿彈性的餃皮包著鮮甜爽蝦，那有不好吃的理由。沙律明蝦筒，侍應叔叔一放上檯，心裡即時閃過無叫春卷架喎！而且何解無跟喼汁？細看一下春卷塞滿沙律醬既？原來係沙律明蝦球，唔係蝦球咩？睇多次餐牌，正確係蝦筒先真啊﹗近來經常睇錯字，莫非真係老花？陰功。炸得出色非凡，我都係第一次讚炸沙律醬、熱沙律菜色。炸得沙律夠晒熱，程流質、程乳胳狀態，牢牢的緊抱著大蝦球。豪爽地整粒吞下，暖笠笠的甜酸沙律醬拼上爽彈蝦球，鮮蝦味依然突出，未被掩蓋。春卷皮金黃鬆黃不油膩，極之可口呢！

招牌腸粉王，鮮蝦腸粉的粉皮半開放式非常獨特，不是完全捲著餡料，而是上下各一塊像三文治一樣，巨形蝦球爽爽的。牛腸勁茜味，吃不消。叉腸蜜味甜美，足料無欺場。粉皮始終太厚，欠滑溜感要扣點分數。古法馬拉糕，十分鬆軟震騰騰上檯，試食少少，食肉獸不懂欣賞。杞子桂花糕，不吃甜的我，入口清香微甜可接受。

鮑汁鳳爪，鮑汁香濃不咸不濃，雞味芬芳。雞腳雖瘦削但膠黏非凡出眾還十分入味，好食啊 ﹗鮮蝦豆苗餃，若隱若現半透明的餃皮蒸到半溶過火，一夾快就爆開喇 ﹗驚奇地豆苗散發超強菜甜味，爽甜菜粒撞上香彈蝦粒非常美味，但餃皮質地實在太差呢。欖角蒸排骨，滑嘟嘟跣得那麼利害，用筷子都夾不到！油油略肥，好采都有點肉食下，醃味可口帶一丁點辣香，可以呀。潮式蒸粉果，給我的感覺始終非常油淋淋，不喜歡。

椒鹽豆腐，外脆內嫩，炸的真的不錯，椒鹽剛好不咸不嗆。椒鹽茄子，棉棉的茄肉被鬆化脆漿包著，酥香好食。瑤柱蛋白炒飯，油份偏多喎，瑤柱顯眼，份量十足無欺場。蔥花、菜粒跟蛋白，炒得香香的，食得過。肉絲炒麵，脆麵索汁，大路的品質。芽菜沒有嗅青味，我都食得到。色香味不錯，整體中規中矩。