廣成冰室 (Under Renovation)

沒有明仔還有成仔，星期一明記腸粉無啦啦無開門，唯有轉場廣成呢，我仲專程行到老遠想試炒麵同魚肉燒賣添，失望而回。火腿通粉，唔知點解口快快叫左腿通，其實想叫牛通，可能由細到大食腿通最多，已經深深烙入潛意識中。傳統通粉不是即食通粉類，依舊不怎有彈性，質地粉口而厚身，原始懷舊風格。侍應嬸嬸話係牛湯低，但清湯底淡如水，完全食唔出有牛肉味道，所以立即要加辣椒油救命。嘩，依隻桂林辣椒油咁辣既？什麼牌子來的？額頭有少少冒汗，但夠晒惹味刺激，爽乎。蛋治焊底，多士香脆聽得到扯開時既聲音，非常美妙動聽！厚蛋熱辣辣滲著微微蛋汁，可以再生少少再嫩滑少少。清爽蛋味併上香口多士，滿意！如果牛油能夠添多一點點就更香更美味啦。其實 menu 真係好細，無咩選擇，對廣成自己當然好做又易控制成本啦。只有通粉、火腿、雞蛋、鮮牛、菠蘿油、三文治。無即食麵、無意粉、無餐肉、無咸牛、無雞髀、無雞翼、無沙律。但不知為何會受到大眾追棒，人氣急升！可能大家都想懷緬一下惜日香港既繁榮，實而不華既光境。