越港正宗越南湯粉 (Closed)

「隱世」「小店」「美食」「邪惡」「超人氣」，相信大家見到呢啲字眼第一時間都會諗起喺乜假期收咗人錢去寫嘅食評會岀現。喺寫緊呢篇食評時個標題本來係「灣仔隱世越南美食」，但之後諗多陣覺得太做作，太似打手會寫嘅標題，太似乜假期啲標題，所以最後改咗做依家你見到嘅標題。Ok，廢話講完，可以入正題。越港喺灣仔玩具街隔離，近灣仔街市嘅一條橫巷入面。當日帶咗朋友去灣仔見識一下玩具街，佢好開心咁睇咗幾個鐘，買咗兩盒模型，我唔太清楚啲模型岀面賣幾錢，不過朋友話有啲款平過佢平時喺旺角買。佢開心就得啦，睇完都已經3點幾，邊行邊揾食咩，行到近街市嘅後巷見到有間越南嘢，而且2點半之後有下午茶餐，掂，入得。坐低之後問老闆娘午餐同下午茶餐嘅生牛河有咩分別，老闆娘話下午茶平啲同細碗啲。因為都遲咗食晏，就叫碗細啲嘅河粉啦。牛肉普普通通，但係碗湯有驚喜，牛肉味比想像中濃，而且唔似係味精，食完之後唔會好頸渴。48蚊有咁飽嘅一餐，仲要係已經細碗咗，好飽好滿足。

好耐無食越南野... 早幾日比我食完飯行行下街見到呢間越南小店.. 今日黎到.. 一望以為無位, 原來重有樓上... 真係好唔駛等位. 佢有套餐同埋散叫. 套餐多杯飲品.  食品都係一樣.我叫左個香茅豬扒河. 豬扒係分開上(唔怕會浸林). 重可以叫佢地走青. (走蔥同洋蔥) 重都會比碟辣椒同青檸你. 不過我本身唔食辣. 呢碟就白白浪費左. 好.. 講下個湯河. 首先個湯雖然走晒青. 但都好鮮味. 唔駛驚佢會淡而無味. 個豬扒份量都唔少. 食落去好香香茅味. 而且煎到軟硬適中, 唔會硬.啖啖肉. 好好味. 同事們全部叫生牛肉湯河. 其實重可以轉飯或檬. 試左舊生牛肉. 都係好新鮮. 好軟滑.  湯底都應該係同款.但因為有蔥同洋蔥, 所以更香. 咪睇佢一碗好似好細.食完飲埋杯飲品. 飽晒..

放假同屋企人行下灣仔，夏晝又熱又焗想食啲開胃嘢，見到有間越南菜新開，就決定試下啦。小店位於灣仔Hotel Indigo/囍帖街附近，旺中帶靜，冇特別裝修，但夠乾淨光猛。坐低睇下menu，有湯河，飯，撈檬，連少見啲嘅濱海都有，一行四人決定樣樣都叫啲。主食叫咗生牛肉湯河，鮮蝦蕃茄檬，雞串撈檬和豬頸肉濱海，加埋小食燒蔗蝦，米紙卷，同牙車快。最欣賞生鮮蝦蕃茄檬，我重加追加咗越式牛丸。蕃茄湯鮮甜，夠開胃，好多配料，連我咁大食都夠飽。爸爸叫嘅生牛肉湯底清甜，有牛味，飲完都冇口乾就知冇加味精啦。小食我最like 蔗蝦，啖啖肉得嚟又唔油膩。牙車快都唔錯，啲菜夠新鮮。叫到成枱都係食物，加埋即開椰青，最後老闆送上小甜點，假日午餐大滿足！小店真材實料夠誠意，價錢親民，一定會再幫襯。