洪祖師 (Closed)

本來同女朋友諗住去食潮興旺，泊低車後見到呢間台灣小店，於是試下新嘢。先睇餐牌，都幾多選擇，尤其係小食方面，價錢都算抵，我叫左個紅燒牛肉麵$68，女友叫左雞肉麻醬熱拌麵$58，呢個價錢仲跟杯台式飲品，另外可以半價加個小食，於是揀左鹽酥雞同滷牛筋。先上小食（唔記得影相），鹽酥雞即炸，個皮好脆，椒鹽都落得適宜，不過皮略嫌稍厚，肉都嫩嘅。👌🏻滷牛筋好腍、入味，加少少椰菜，唔錯。👍🏻主菜先上牛肉麵，呢度嘅麵係寫手工嘅，食落口好彈牙，應該真係手工製，湯底好濃郁，我女友話有台灣味。牛肉驟眼底以為好鞋，但食落係多汁，唔會靭，我欣賞佢有埋紅蘿蔔同菜，健康啲。😋女朋友叫嘅麻醬麵，佢揀左少辣，我地食過都覺得個麻醬好濃郁，配埋個麻辣味好夾，舖頭係有花過心思嘅，欣賞。🤤最後兩杯珍珠奶茶，叫左少甜走冰（飲左幾啖先記得影相），滿意佢真係有少甜，好多舖頭叫完少甜都係咁甜😂味道上夠奶味，有台灣嗰隻茶香味，珍珠正常，彈口，我地都滿意。全單$151，食咁多嘢有埋嘢飲，味道仲要幾好，我地都覺得有驚喜，大家可以一試。

由於之前好幾次搭車經過見到喺上水馬會道嘅「洪祖師擔仔麵」一直都好想嚟食，今日終於可以抽到時間嚟食個下午茶！我們叫咗紅燒牛肉麵嘅牛肉嘅肉質非常鬆軟腍身，牛肉味好香濃，麵質亦相當煙韌彈牙，至於湯底聽店員話係用他們嘅獨門秘方去餚製，味道係極之鮮甜同芳香濃郁，所以我們就飲到一滴都無淨，真係超正呀！豬腳三重奏嘅豬腳燜得好腍好入味，質感非常煙韌軟滑，而且係汆過水，所以完全無好油膩嘅感覺，至於肉質就好鬆軟，唔會「硬實實」，豬皮嘅質感相當煙韌彈牙，而且有好豐富嘅骨膠原，再夾埋舖底嘅椰菜一齊食，感覺好清新，一啲膩或滯嘅感覺都無，真係超正呀！不愧可以得到雜誌「最回味食府金奬」！珍珠奶茶嘅茶味好香濃，珍珠嘅質感亦好煙煙韌韌！青蘋果椰果嘅青蘋果味道好清甜芳香，而椰果嘅味道就比較甜！