光榮冰室 (鴻威大厦)

Open Now

Now Closed

好食嘅良心店有唔少，平嘅都有唔少，但又平又好食嘅光榮絶對係當中的佼佼者，我諗除咗係得座位比較迫之外都無乜大問題，正宗港色茶記快靚正加抵！重要抵食夾大件，完全係為人民服務咁，唔乜點想賺您錢咁，作為一個茶記老闆，算係有良心。蔥油雞扒飯 -面頭勁多已煮過嘅蔥油，好香，雞扒大件得嚟又好脆口，重要炸得好好，外脆內嫩，飯重要好多，真係黐孖筋，完全係不計成本咁。作為一個香港人，真係諗唔到一個理由係唔去幫襯光榮，又平又好食，重要個老闆咁有良心，有時間就要去幫襯下喇。

「又好食, 又抵食, 又親切, 香港人嘅食堂!」食評一開始, 先來一個總結。疫情嚴重, 街沒什麼人, 很多公司都不用上班, 又因為剛好中午12點, 未到繁忙時間, 難得不用排隊就可以食到光榮冰室。未到繁忙時段, 自然食客食得輕鬆啲, 侍應又做得「他條啲」。這點大家是明白的。光榮快餐 B 一份: 蔥油雞扒飯 + 凍檸檬茶($45)。蔥油加特製豉油汁, 光榮嘅招牌其中一部份, 味道不容置疑! 飯質軟硬適中, 又香又夠熱! 大大塊的炸雞脾, 外香脆, 內嫩滑, 用料又新鮮, 份量充足, 一般OL食客很難獨自完成。凍檸檬茶, 正常水準, 茶味略為「澀」。另外點了「全日特餐」: 蜜汁叉燒通粉 + 火腿奄列 + 牛油麵包 + 熱奶茶($45)。蜜汁叉燒很有驚喜, 叉燒肥瘦勻稱, 充滿蜜糖及燒烤香味, 非一般貨色。通粉及湯底, 水準以上。 火腿奄列都好味, 蛋異常香濃, 火候剛好, 內裡是流動的蛋汁, 可惜「薄」了一點。牛油麵包, 正常, 新鮮。熱奶茶, 屬於同區的頂級。「又好食, 又抵食, 又親切, 香港人嘅食堂!」總結, 再講一次。

佢其實就好似其他茶餐廳咁，會有好多menu係牆上面，你可以睇下個期有咩推介。佢地嘅嘢食價錢唔高，但十分足料。蔥油雞扒飯（$45）你見到塊雞扒就大過個碗，就知佢塊雞扒係幾咁大啦，佢雞扒係有炸過嘅，因為外面有層脆脆嘅炸皮，所以你一食落就知道係咪即刻整嘅。佢就冇炸過龍，所以唔會好鞋。份量好大，我只係食到一大半已經好飽☺️沙嗲牛肉包（$25）麵包係用熱狗既包，加上好多汁既沙嗲牛肉係上面，真係啖啖都有肉。不過我覺得個沙嗲汁太重花生醬味，就有少少怪。套餐全部都有嘢飲，仲要凍飲都唔使加$3😀

相信唔少香港人都認識光榮冰室，我聽就聽得多，今次係第一次幫襯，同先生行過附近，見好多人排隊，行近一望原來係鼎鼎大名嘅光榮冰室，當然要幫襯下。餐廳入面冇乜特別，係舊式茶餐廳嘅格局，食物亦係大路嘢，價錢合理。有幾款出名嘅飯餐係特別吸引，四十幾蚊包飲品，相當抵食。本來想試下大受歡迎嘅三萬完蛋飯，但一早已經售罄，唯有轉戰同樣出名嘅雞扒飯，我揀咗蔥油雞扒飯，而先生就揀咗三眼仔雞扒飯。雞扒份量超多，有成兩大塊雞扒，非常慷慨！雞扒外皮香脆，啖啖肉，肉質唔會好乾，仲保持到鮮嫩嘅肉汁，質素唔錯。雞扒再好都需要薑蔥油扶持，薑蔥油簡直係成個飯嘅靈魂，鹹淡適中，薑蔥嘅香味好特出，令成個飯變得非常惹味！另外白飯亦係粒粒分明，飯味突出，齋用薑蔥油撈飯已經令人滿足！凍奶茶雖然稱唔上香濃，但質素尚可，四十五蚊包飲品，凍飲仲要唔使加錢，夫復何求呢？先生叫嘅三眼仔雞扒飯比我嘅多咗三隻太陽蛋，價錢都係差四蚊，的確係無懈可擊，蛋仲要煎得幾靚，一啲都冇揸流攤。凍檸水亦非常正路，慳返三蚊覺得零舍好飲。親身體驗完終於明白點解大熱天時都咁多人排隊，食物質素的確係唔錯，特別係蔥油雞扒飯，成個組合都冇得彈，價錢又實惠，真係抵佢咁多擁躉！

三萬完蛋飯冇食到因為🧒🏽唔可以食饅魚呀sad，所以我就叫左常餐既叉意同奄列，個奄列既蛋係超級好食好高汁呀真係好正，而👦🏻就叫左佢一直都好想食既蔥油雞扒飯 ，嘩真係好不得了呀，個蔥油好好好香呀，連🧒🏽唔食蔥既都食左幾啖哈哈🤣雞扒又大塊又脆又juicy ，而且份量都仲好夠 ，加埋甜豉油撈飯食到👦🏻lamlam脷呀😋講真佢地既凍啡都真係好正，唔係普通hea沖，真係飲得好開心，仲要佢地既凍飲係唔洗加錢呀，講真仲邊有咁好咁有良心既，咁就緊係撐啦哈哈哈🤗🤗🤗

今日特登去幫襯三萬完蛋飯外賣，下午6:00左右去到，除咗Order咗三萬完蛋飯，仲叫咗個蔥油雞扒飯。兩個飯連兩杯凍齋啡，$100有找。三萬完蛋飯有差唔多有半條鰻魚份量切成4大塊，配上又香又滑，生熟程度啱啱好，食落一啲都唔老嘅滑蛋。鰻魚尚算厚身，口感十足，鰻魚油香同醬汁味濃。蔥油雞扒飯，十分之有驚喜，雞扒醃得非常之入味，有啲似香茅味，而且唔係一般煎雞扒，應該係炸嘅，但係一啲都唔油膩，食落香口，啖啖juicy十足，配上蔥油同豉油汁，送飯一流！齋啡都值得一提，咖啡☕️味香濃而唔苦，aftertaste後勁十足。無限支持，價錢相宜貼地，食物質素唔會將貨就價！香港人嘅食肆！