泗益

Open Now

Now Closed

聽聞食呢度嘅咖央西多士要講緣份，很可惜...唯有食蛋牛治，餐蛋麵，飲杯茶走。唔洗驚，兩個人食嘅。等呀等，終於有位，不過好驚驚，坐咗喺樽石油氣隔離。啲阿哥阿姐全場唔洗寫單，落單、追單、埋單，全部口噏噏，勁！蛋牛治($17)：不過不失啦，同澳洲牛奶公司比就更係比下去。餐蛋麵($23)：都係咁啦，有咩期望？茶走($15)：我本身唔鍾意飲奶茶，心思思飲咗啖，我諗茶走就係為咗呢個味，有茶味而不苦澀，質感滑，順口順喉，好味！

聽講尼間野既西多士好出名，所以黎到就決定試下，因為差唔多關門，所以豬扒包已經冇哂。叫左西多士($30)，蛋牛治烘底($14)。蛋牛治既餡非常厚，牛既份量多，而且烘底好脆，外脆內熱，肉汁juicy，雖然烘左，但食落唔乾，又抵食。西多士我個人唔太鍾意，係符合西多士既做法，炸得夠。不過好油膩，好似食緊包浸油咁，自己接受唔到。但食開西多士既朋友，應該會鍾意。如果有得揀，食多份蛋牛治更岩我。西多士製作需時，要等。特別在於唔係正方形。總體，細細間，我見好多人都只叫1碟西多士，但老闆都冇黑面，一樣好好招呼。

平日幫儭下，並無出現其他食評既問題，西多士5分鐘内就做好，服務態度屬於非常好，對全部顧客都係有禮非常，所以好多所謂問題，都應該係出現在周六日人多排隊下，做吾切所做成，我覺得周六日既顧客應該以體諒既態度睇事物。奶茶其實吾錯，味道好濃。餐廳貼有雜誌推介，話這裡既西多士好脆，我覺得係D職業食評家既寫法，因爲我睇咗前後左右台既西多士，都係屬於軟綿綿既效果，絕對吾屬於脆既狀態。這裡既西多士既特別應該吾係脆吾脆，都吾係用咗咖央，而係這裡用既咖央估計係自己做或加咗D香料，所以味道吾係超市賣既罐頭咖央味道，我估計係加咗班蘭葉。不過24蚊屬於過高，應該係出咗名既結果。蛋牛治屬於正常味道，不過師傅切成四塊，有誠意。

6月22日, 哈哈哈!! 天氣超級好~~~ 同呀比入赤柱閒逛一下~ 嘩揸咗粒幾鐘車加搵位先入到去~ 黎到好彩唔洗等位, 而且有幾把特大風扇吹住, 先未至於咁熱~::: 西多士 ::: $15塊西多圓圓地好得意~ 面頭只有兩大片牛油, 無糖醬既~ 原來好戲在裡頭!! 西多入面唔係花生醬, 反而係一層薄薄半透明奶白色的香甜咖央醬~ 多士個口感亦同其他西多唔同~ 咬落真係超級鬆發!! 原來老闆先將麵包浸滿蛋黃, 再撲上打起的蛋白~ 真係好有心機, 同埋好好味呀~ ::: 蛋牛治 ::: $11雖然麵包比較軟… 陷料都係薄薄一片. 但係蛋同鹹牛肉混合好先煎, 蛋煎得香, 牛肉仲好脆口!! 所以感覺都好好~::: 凍奶茶 + 凍檸茶 ::: $24唔知係咪西多太甜, 凍奶茶有d唔夠味. 感覺呢度既野飲就無食物咁出色喇.我覺得呢度既食物之所以好食, 係因為整既人有心機~ 肯用多d功夫整到d食物特別d~ 不過d野食portion唔多, 大食的人實唔夠飽啦~ 加上整件西多要10分鐘~ 如果可以涼涼地既日子黎食個tea就最理想!