金萊餐廳 (Closed)

呢間茶餐廳撇甩印象中既佬味，粉紅裝潢比得上現時cafe，門口仲有棵聖誕樹，增添節日氣氛!餐牌價錢係銅羅灣區唔算貴，份量都大份，仲要免加一，性價比高。🔸星加坡海鮮喇沙湯米線 $92本身對茶餐廳喇沙唔高期望，點知有驚喜。碗係平常既1.5倍，兩個女仔share 都可能夠食。湯底香料味重，飲落有顆粒感，證明落足椰漿，所以微辣中，甜味較重，幾開胃。材料豐富，有白魚蛋、蝦、魷魚、帶子、豆卜、雞蛋... 師傳貼心剪走蝦頭啲鬚，食落方便。米線吸湯力強，食到最後冇左大半碗湯，好飽肚。🔸金萊鐵板雜扒 (蒜蓉汁) $118基本上每台都會叫鐵板餐，因為抵食大份! 雜扒有齊豬、牛、雞，塊塊有男人手掌大。最中意雞扒有厚度，肉質嫩滑; 豬扒似有層炸衣包著，所以唔乾柴; 牛肉易切軟身。🔸西班牙黑毛豬叉燒皇 (例牌) $150黑毛豬出名肉質軟嫩，半肥瘦叉燒有少許燶邊，淋左經典蜜糖蠔油豆，所以甜味較重。🔸雪糕紅豆冰 $33小時候的味道。紅豆佔左三分一杯有多，大粒飽滿; 雪糕係雀巢雲呢拿味，同椰汁溶為一體，飲落稠身香甜，係回憶的味道。🔸凍奶茶 (跟餐 +$3)奶茶大杯夠滑!

今日同男朋友行過銅鑼灣，突然間好想食中餐同埋食下叉燒，揀左間好靚仔乾淨企理嘅茶餐廳，店員話樓上雅座，上到去真係好寬敞同清靜舒服。西班牙黑毛豬叉燒皇 $128我地叫左照牌叉燒皇，竟然係用西班牙黑毛豬整嘅叉燒，呢一個fusion又幾有驚喜，舊舊叉燒半肥瘦好吸引。晚市二人套餐 $170見到個二人餐都幾抵下，咁就叫多左兩個餸食，套餐仲包兩個白飯同埋兩碗例湯，不過野飲就需要加幾蚊，不過都好經濟抵食。金銀蛋浸時蔬呢一個真係好正，我地揀左白茶仔，份量望落唔係好多，不過兩個人食岩岩好，湯底清清地加埋鹹蛋嘅味道，好好味。水煮魚片(龍脷魚)水煮魚片本身好驚又有骨個啲，食得唔夠爽，但係餐廳用左龍脷魚柳，啖啖肉，真係好爽，而且辣度好夠好惹味，淨係個汁都撈左成碗飯食。Overall黎講，以往嘅茶記總有一種懷舊嘅味道，但係金萊整體感覺好小清新，完全唔似行左入一間茶餐廳到食飯，而且套餐個啲都好抵食，餸又大碟，最驚喜係個黑毛豬叉燒，好正。