Hunger Burger

Open Now

Now Closed

行經西九龍中心，food court入面多咗一間賣漢堡快餐小食嘅餐廳，價錢經濟實惠，仲有優惠，一於同朋友去食。餐牌有多種漢堡，有常見嘅牛堡、雞堡等等，仲有吉列類別添。食物全部即叫即煮即炸，熱辣辣。超經典芝士牛堡($50)，漢堡大大個，熱辣辣又香。肉塊好重牛肉香味，而且厚身，d肉汁邊咬邊流出黎，超juicy。而芝士半熔，配搭蕃茄、生菜、茄醬，就係傳說中嘅經典口味。麵包面好多芝麻，烘過嘅包係好食d，香。加$15仲可以升級套餐，有薯條及可樂，或者再加錢可以有其他小食/飲品。薯條屬於厚身，口感十足，脆脆地且香口，仲要份量唔少添。食哂成個套餐之後超級飽。大大啖吉列魚柳堡($49)，吉列魚柳炸過後脆卜卜，炸皮薄身，魚柳肉質滑嫩，同樣大大塊，大過個麵包。加入洋蔥、酸瓜，醬汁清新，配搭炸物完全唔會油膩。愈食愈開胃。如果take away，仲有店舖膠袋裝好一盒盒。堂食就可以坐係food court提供嘅座位。

西九龍中心food court最近大變身，開咗好多新嘅食店，今日我就揀選咗呢間Hunger Burger。有質素嘅漢堡包，動輒都要$80，但呢度嘅定價就只係$50上落，始終呢一區價錢都要比較大眾化，先可以吸引到區內食客。仲有提供學生餐優惠。小店人手不多，而且新鮮製造即叫即整，所以都要耐心等候，不過見到開放式廚房入面非常企理，所以都好安心食用。店面仲有提供茄汁同芥辣醬，可以自由添加。第一次試，就揀個平實啲嘅漢堡，呢個超經典芝士牛堡究竟可以有幾經典？漢堡簡單就是正宗，厚厚嘅牛肉漢堡扒，上面加上芝士、蕃茄、生菜，再配上醬汁，牛肉汁同時滲透麵包入面，簡單而滋味！食漢堡包通常只會配薯條、薯角、薯格⋯，總之就係炸嘢，但呢度仲有得揀西蘭花，而我就另外叫咗一客香蒜西蘭花配魚柳。西蘭花用蒜鹽炒香，充滿濃濃嘅蒜鹽味。魚柳份量都唔少，一大塊魚柳扒，店員將佢分成四件，肉質都算滑，上面灑上蒜鹽同香草，真係夠晒香！

西九龍中心Food Court裝修之後有幾間新嘅餐廳進駐，今次試咗漢堡包先，下次再試其他餐廳，食物即叫即製，大概要等十幾分鐘，留意外賣要加$2。西蘭花配魚柳$50- 推介！魚柳本身係炸嘅，不過我問佢可唔可以煎，佢話可以，咁就冇咁熱氣啦。西蘭花、椰菜花加蒜頭呢個組合冇得輸，仲有檸檬汁提味好清新。魚柳質地軟滑，我個人認為偏鹹，同蔬菜一齊食就啱啱好。下一次我會想試西蘭花配牛肉。黑松露芝士牛堡$59- +$15配香蒜焗西蘭花、枝裝水，食蔬菜感覺多啲纖維健康啲。牛肉漢堡扒都幾厚，質感唔會乾同實，黑松露醬味道幾好，朋友話越食越好味。超經典芝士牛堡$50- +$15配薯條、罐裝汽水。薯條偏鹹，漢堡入面加左好多茄汁，雖然牛肉唔係高檔次的質素，呢個漢堡絕對對得起呢個價格，起碼有牛肉味。推介！