鳳鳴居

Open Now

Now Closed

因有事要到上水處理，又正好接近中午食飯時間，所以心思思又去食這個「鳳鳴居」的醉香雞湯麵。今次好好彩，剛剛是1:00pm 可能未到放飯時間，一去到就有位直入去，唔使等位有驚喜！今次又再encore 我最愛的「醉香雞湯米線」、再試了另一個「蔥油雞飯」。醉香雞湯味香、今次的酒味好像濃了少許，不過加上雞湯味仍是我的最愛，雞肉今次就比較冇咁嫩滑好味道！不過這個雞肉只是配角，湯才是主角！葱油雞飯就比下去了，葱油香，雞肉就一般。

朋友知我鐘意食雞，推介呢間經常排隊的人氣食店，經過上水慕名嚟試，果然好介紹！醉香雞湯（$50）主角當然係醉香雞湯，我哋點咗一個醉香雞湯米線、一個醉香雞湯飯。一上菜就聞到濃濃酒香味，好醒神。 呷一口湯，湯甜酒香，湯底有紅棗木耳，好好味，不自覺一口接一口，飲到一半，忍住唔飲，因為要留番啲嚟送飯😅。雞肉有六七件，唔算好嫩滑，但滲入淡淡酒香，肉質鮮甜，唔點豉油都夠味。米線幾爽，都食得晒。黃金魚皮（$40）平時食黃金魚皮總覺得放隔夜，唔新鮮，有浸隔夜味，但呢間嘅黃金魚皮，蛋黃咸香，炸得超鬆脆，食到嚓嚓聲，食到唔停口，冒住超標風險都要食🤣

🍜醉香雞米線（$50）湯底好足料，飲落口好鮮甜；雞件數目唔算少同埋大件，食落口都算嫩滑同夠味；配有雲耳同紅棗👍🏻上菜嘅時候會俾埋辣椒豉油同放雞骨嘅碟，好貼心嘅服務值得一讚

醉雞麵食得多，但就未食過一間令我成日掛住佢嘅。有日咁啱去開上水就去試下總店，門口有人等緊外賣，入面就冇坐滿人所以直接入座。唔洗多講第一時間嗌左個醉香雞湯米線 $50，麵有好多選擇，不過我鐘意食米線所以嗌哩款。成間舖都帶住好香嘅醉雞味。嗌完好快就有得食，想讚下有樣嘢好好，麵一上，就有埋一小碟辣椒豉油同一個俾你放雞骨嘅碟仔，覺得哩樣嘢好抵讚，唔洗自己嗌，好體貼，又唔洗擔心啲雞骨要放邊好！一黎就試下啖湯先，一飲就覺得又香又甜，好鮮，唔係味精嘅味道，酒嘅味道又唔會過濃，係會忍唔住係咁飲湯。雞件方面有雞脾同雞胸嘅部份，雞胸係比較硬，但係可接受範圍，本身就咁食雞就已經好夠味，但掂埋個辣椒豉油就變得惹味，唔食得辣嘅人都唔洗擔心，bb辣黎，吊下個味好好食。除左雞仲有幾塊木耳，都幾大塊，仲好爽下，冇煮到好淋。米線質地好完美，係帶煙韌嘅口感，又吸左少少湯嘅味道，一啖湯一啖米線一齊食真係好好食！哩個價錢，哩個味道，可以encore無限次。

好多年無去上水，最近聽朋友介紹而專程去上水食。對上一次覺得好食嘅醉雞米線 應該都起碼十年前 仲要唔係香港 今次終於係香港搵到食完會再想食嘅醉雞米線。湯底嘅酒香味 令我成碗連湯都飲晒 加上雞嘅份量夠多 最重要係 超～嫩～滑 （我好怕食鞋口雞）食完個人好㷫烚烚，叫多杯凍啡，絕對飲得出佢杯啡係有落心機，咖啡味濃厚，一凍一熱，都咁有水準 爽呀！工作人員都係後生仔多，快手得黎係有禮貌，個場係有播歌，有時會成班係到唱歌，好有小店嘅風味。

來到上水不得不介紹呢間黃店，北區人心目中嘅最愛, 亦係我嘅最愛，這間粉麵店以食雞主，究竟呢間粉麵有乜吸引之處，就係藥膳雞湯底喇，講講吓都流口水添麵類：醉香雞湯、姫松茸雞湯、蟲草花雞湯、芫荽雞湯、喇沙雞湯、麻辣雞湯、花膠雞湯、花膠醉香雞湯、清雞湯、蘿蔔清湯腩、蕃茄濃湯雞，粉麵可選擇米線、油麵、米粉、河粉、公仔麵等⋯⋯如果唔鍾意以上嘅，又唔想食雞，可以自選湯麵同湯底，配料就係車仔麵嘅餸，豬紅丶蘿蔔丶豬皮丶芝士腸丶乜丸物丸、雞翼尖、牛腩、豆卜，仲有其他⋯⋯⋯⋯唔食粉麵，其實呢度都有飯或者湯飯嘅選擇，醉香雞湯飯丶花膠醉香雞湯飯、蘿蔔清湯腩飯丶沙薑雞飯、蔥油雞飯、口水雞飯、鰻魚飯㗎⋯⋯醉香雞湯米線 $50湯底好香嘅花雕酒味，仲帶少少甜味，我好鍾意，雞都幾嫩滑㗎，配上米線正呀喇沙雞湯米線$50喇沙湯都一樣咁好味，喇沙唔會好辣，啖啖椰香味配上米線又係好正。自選蕃茄湯底 $50如果有小朋友唔食辣，蕃茄湯底都唔錯㗎，大人小朋友都啱食。生意實在太好了，當日晚上六點左右，都要等10幾分鐘先可以入座，繁忙時間就可能要等耐少少喇。

山長水遠嚟到上水，梗係想試吓啲好嘢啦🥶喺朋友強烈推薦下，我哋去咗間專食雞湯米線嘅餐廳——鳳嗚居🐥🐥醉香雞湯米線 ($48)碗米一擺上枱面，浸浸花雕酒味已經撲鼻而來🥶首先試下個湯底，果然冇令我失望😝個醉香雞湯好濃好足料，好似倒咗成支花雕酒落去咁濃🥃雖然有雞，但湯底都唔算好油，所以一路食就會忍唔住一路飲🤗呢個價錢嘅雞件就一定唔係新鮮雞，但口感都算嫩滑，唔柴🤤而且每碗米線都會等一碟自家製辣椒豉油，用嚟沾雞食一流🥰米線口感彈牙，索哂啲湯汁👍🏻配菜仲有紅棗、雲耳，幾足料🤩🐥黃金魚皮 ($38)原本想點春卷，但嗰日兩點幾已經售罄🥲所以最後轉左點黃金魚皮🐟即叫即炸，賣相唔錯🥶熱辣辣口感好脆口，炸完都有索哂啲油先上碟👍🏻但唯一挑剔嘅地方係鹹蛋黃味較淡，食落同普通炸魚皮冇乜好大分別，建議加多啲鹹蛋黃令整體感覺更加惹味🤩整體質素好唔錯，好適合近排咁凍嘅天氣食👍🏻熱辣辣十分暖胃，而且好抵食💛會再訪試其他湯底😚

鳳鳴居主打的都是吃雞，麵類的價錢是$48-88(最貴的因為是有花膠)。如果不吃雞的話，亦都有至少兩餸起的自選湯麵($20)，湯底的選擇有喇沙、麻辣、清雞湯和蕃茄湯，而配料都是一些普遍的蟹柳、小雲吞、魚皮餃、豬大腸和豬軟骨等等。他們的小食有19種這麼多，價錢是$12-60(最貴的是小食拼盤)，應該很值得試試，例如有蒜蓉辣辣雞翼尖($18)、辣豉油爽脆鵝腸($48)、碗仔翅水餃($38)、蜂巢春卷($28/6條)和醉肝腎($23)等等的都是小編想試的。小編第一次來到，就要第一項的醉香雞湯米線($48)，要注意他們的醉香雞是生滾雞，是需要時間去焗，要耐心等候，而且不能選擇雞的部位。最後其實沒有等很長時間，湯麵就來到了，一上枱香氣撲鼻而來，金黃色的湯底，果然很濃味，而且酒味也很突出，亦都有藥材味；雞件大概有6-7件，幸運地有雞髀和雞翼，肉質很滑，但不太有雞味而且味道淡，即是不夠入味；米線的質地也不錯，不是最便宜的那種輕咬就散。最令人失望的是雞沒有雞味，希望這點會有所改善，而湯底真的很不錯，很推薦。還有一點，如果是較少喝酒的人可能會覺得酒味較重，然後有機會會覺得醉。