豪隍點心 (Closed)

Caterking Dim Sum

3.5

114 Reviews

Taste

Decor

Service

Hygiene

Value

2025

Tsim Sha Tsui

$51-100

Guangdong Dim Sum

金絲豬頸肉

2 Recommended

奧志雷

Level4

2.1K

Read full review

終於正正經經返份長工，我真係老懷安慰，雖然每個月仍然要資助資助，不過情況點都較以前好啦。專程老遠走到尖沙咀跟您撐撐枱腳鼓勵一下，返工當然辛苦，加油加油！

新界天氣冷，要去較暖城市地方。恤完個靚髮專程到訪嘆個靚茶，豪隍點心質高真心不容置疑，不過最好食最頂級點心始終非已榮休的銅鑼灣曉廚軒莫屬！高級酒店質素，最少都有米芝連 1 星評價。

前面有三條大陸友等位，我獨自一個照行入去查詢問問，老闆居然回應要求我出門口等？真係大膽！要等位我即閃去食碗麵舒舒服服醫肚，好過係街邊污煙漳氣罰企啦！誰知老闆衝出黎老遠嚷著，先生有位喇！見您盛意拳拳，好啦好啦。

大媽優先？點解兩個自由行可以坐四人檯呀？我兩個就要迫係角落頭二人迷你檯？我堅係頭頂出煙著晒火，全程黑臉縐眉頭。收銀叔叔唔理，侍應妹妹唔理，直到點完菜，女皇見我情緒失控，所以主動跟四眼叔叔話十幾個點心可否轉張大檯呀？終於安排我地轉梳化卡位，我團怨火先慢慢熄滅！多國語言的點菜紙，中英韓文都有，遊客區係有所不同。餐牌顯示那個溫泉蛋牛肉飯使我心有戚戚焉，機會黎既時候一定要試試。

叉燒腸粉，設置整齊得體送到，靚靚仔仔。雖然粉皮略厚，勝在叉燒份量多，嚥韌香甜滲肉汁，不過咸不膩滯，滿意食得過。鵪鶉蛋燒賣，點解可以如此色香味爆燈？無得輸！整粒啪入，結實的肉球爆汁跟甘香鵪鶉蛋融合！化學反應大爆發，咸甜乾濕腍彈交錯，將食味推到最高峰！

魚肚四寶雞紮，熟練的手腕捲得雞紮結實不散，頂級重料獻上極有誠意，必食之選。當然要四種食材一齊咬才算得上真正食緊雞紮，不過新鮮蒸起實在高溫燙嘴，要拆散降溫續一擊破。魚肚爽彈吸汁，所有雞菇腿精華所在，濕潤爆開美味叫好！雞柳醃味濃郁得宜醒胃，愛不釋手。火腿條優質彈牙，咸鮮肉汁吸引。冬菇厚厚滑嘟嘟，菇汁滴滴味道清新。腐皮嚥韌香口，拖著汁液格外提醒。

蝦仁燒賣皇，蝦爽豬甜多汁味美不肥膩，實淨嫩彈啖啖肉，香噴噴就算連食一打都只屬閒事濕濕碎！豪隍蝦餃皇，有料超好食，沒有給我挑剔的空間。鮮蝦大大隻，味濃爽爽，肉質嫩滑，蝦汁跟晶凝餃皮完全合體，鮮味餘韻持久。

高湯鮮竹卷，在湯汁中浸淫浸淫，濃湯慢慢滲透其中，漸漸變成灌湯效果。小心翼翼慢慢咬開，熱到燙嘴流眼水，越熱越興奮越美味！嚥韌香口腐竹皮不夠滑溜吸湯，包著芹菜甘筍菇絲，味道清新蔬甜，最敝芹味強烈我受不了！

薑蔥牛柏葉，不能蒸定保暖的項目，煮過火即變越韌橡膠。新鮮出爐出煙燙燙的，爽彈無比索索聲悅耳非常，嫩嫩的噴著薑蔥香味，優質表演，停不下來地搶食。潮州蒸粉果，形狀端正隻隻均秤吸引，食不到陰功豬！太多蔥花青味太強吃不消，我投降！女皇表示味道不錯，全部替我處理掉。

炸魷魚鬚，愛死鬆化脆漿，不像殼般硬掘掘。炸得金黃乾身香噴噴，爽爽彈彈的魷魚鬚，咸鮮醒神和味，吸收埋酸酸喼汁，有幾多食幾多。墨西哥叉燒包，何解墨西哥？辣的嗎？師傅來至墨西哥？甜甜鬆化包皮微溫，咬落空盪盪，少少叉燒醬完全不能滿足到我。必須即焗新鮮出爐，否則色香味都大打折扣。

鳳爪排骨飯，飯粒清香乾爽，吸收甜豉油，味道質感比預計中好食。排骨骨多肉少，難得鬆軟甜美可口，混合豆豉辣椒甜豉油，不知不覺全部食得乾乾淨淨。上海小籠包，完全移值 7-11 的味道，一模一樣同出一轍！厚厚半溶黐牙包皮，存著大量過甜太濁肉汁，豬肉鬆軟，沾上浙醋連食四隻無難度，食味低但過足口癮。

XO 醬金錢肚，蝦米入饌，有創意估您唔到！不是汁液，真身係厚厚醬黏得緊緊。看似微溫，但入口滾燙出煙，嘴仔痛痛！金錢肚爽彈泛著輕輕羶味，濃醬味厚送飯配較好食。

鮮竹牛肉球，何解係香茜牛肉球啊？餐牌無注明，其實好多食家都不吃芫茜，我係其中之一呢。高溫大肉球三粒，充滿彈性濕濕滑溜溜，淋下大量酸酸喼汁，強酸微甜掉入，可掩蓋部份芫茜草青味。兒時一聞反胃，入口即嘔吐，近年反應已經不會那麼強烈。盡最大努力吞下一粒，茜味實在太濃，剩下兩粒唯有放棄，抱歉抱歉浪費食物。

金絲豬頸肉，想起昨晚大埔三多給我的翻炸豬頸肉，味道陰沉，硬實屍骸陰功豬！眼前依碟新鮮出爐無得頂無得輸！炸得外脆內爽，肉汁盡鎖在內一咬爆開！甜美油脂肉香，讓微酸爽爽醃蘿蔔絲捲上同吃，增添不少清新香氣，亦輕輕減低煎炸感，更醒神開胃心心眼！

豉椒蒸排骨，冠軍級水準！跟排骨飯的色香味一模一樣，不過骨少肉多啖啖肉，半肥瘦不油膩，軟綿彈滑肉汁鼎盛，醃味非凡出眾不嗆不咸，盡是甜美的感覺。

冬菇滑雞飯，啖啖肉的嫩滑靚雞柳，醃味清甜不過份，彈彈無得頂！試試冬菇，霉霉的質地，不鮮不甜的枯菇，不加更好。清爽香噴噴微甜的豉油，雞柳精華鳳脂肉汁已溶到蒸飯中，全部撈勻享用！十分開胃還散發陣陣雞油味道，越食越起勁！雖然碗都被我舔得乾乾淨淨，但極上北菇蒸雞飯只有已榮休的銅鑼灣曉廚軒出品，無可替代！雞柳太美味迅間全數消滅，無送配飯食啊！貪心的人自製豉椒排骨滑雞飯一碗飯兩種享受，碟排骨既豆豉超香好惹味，手多多全部連油撈飯，搞到成碗飯油淋淋自討苦吃！不過味道還是挺好的，回味回味。

沙律明蝦角，剛剛炸起新鮮送到非常高溫，熱力迫人！脆脆的外層金黃乾爽不油膩，包著爽蝦嫩肉在內。但何解沙律醬不在內呢？欠缺半溶酸咪咪的開胃沙律醬助慶，味道硬係差少少。唯有試試外置沙律醬，根本各自各精彩沒有交流，不是那一回事啊﹗

溫泉蛋牛肉飯，誰是溫泉蛋？只不過打隻蛋係肉餅上，再蒸蒸焗焗出爐，長相都算靚仔得體既。蛋漿就是精髓所在！用半隻蛋撈甜豉油檸檬葉嫩滑肉餅已光速被我消滅半兜，美味絕倫無可抗拒的誘惑！只懂不停地大啖大啖塞入口，最初還打算只食少少飯，結果一粒飯都無得留低，罪過罪過，怪您過份美味。

黃沙豬膶腸粉，皮薄半透明，顏色亮麗，若隱若現的豬膶餡極度吸引。從來未食過有啖啖肉豬膶的腸粉，迫爆勁足料！每口都是彈滑肥美豬膶，不乾不鞋不瘦弱，鮮甜不澀非凡出眾。腸皮薄薄滑滑吸盡甜豉油，清香味美，唔想太飽都忍不住全部吞下。

黑松露餃，蝦餃餡來的。特濃黑松露醬味道及香氣，加上紫菜墊底味道異常地合拍喎。餃皮濕濕，滑嘟嘟嚥韌，厚厚的有點濟，蝦仁十分爽甜美妙，熱騰騰有添食的衝動！

豪隍炸雞翼，時光飛逝一等再等，當所有點心及蒸飯都處理掉後，終於壓軸登場！厚厚硬硬刮口的雞翼殼，要全部咬掉放棄，露出白滑嫩肉，舒服多了！食落醃味濃到有點濁，試試無妨。寧願給我正正經經的炸雞翼，可能色香味更有驚喜。