高興 (Closed)

同朋友2個人係觀塘想去間坐得耐又靚的餐廳吹水~上網一search見到呢間cafe裝修好復古就上去望望，當時1:45下午時段諗住都可能要等位，點知唔洗等之餘當日仲有得坐梳化位，附近仲有好多復古的擺設及裝飾打卡一流。介紹返啲食物先，同朋友每人order一個Lunch，呢個蒜香橄油帆立貝意大利麵一上枱就聞到好濃香嘅蒜油味帆立貝外表煎得好香脆，意大利麵嘅靭度都好適中！唔會過淋/過硬，每一條都食到蒜香欖油味整體賣相同味道都十分滿意。另外仲叫咗一個韓式泡菜雞肉烏冬鍋，用一個韓式鍋上令整個賣相都加分，而且仲做到保温作用最令人驚喜嘅事係雖然價錢唔貴，但泡菜同雞肉嘅份量都多，cp值超高！調味都好惹味，豬骨湯底配上香辣嘅泡菜，係絕對無得輸嘅味道！加上雞肉煮得很嫩滑，而且用埋讚岐烏冬，值得加分

同事們又搵到新野試啦……一聽個名都開心……叫《高興》！餐廳地點就有啲偏僻＆唔容易找到，雖然話就話在工廈地面，但我地都在地面行左一圈先搵到呢間餐廳。而餐廳內嘅裝修同環境都很好，感覺好特別又好懷舊。在食物方面……比一般茶餐廳好味，我地都好喜歡呢個口味，但餐份量方面就比較細，適合女孩子食剛剛好，而男孩子就可能會唔夠飽啦。日式咖哩天婦羅海鮮飯，味道甜甜地有咖哩味，咖哩汁配飯就最正。只係個韓式泡菜烏冬鍋比較辣，攪到要叫飲杯特飲先解決到啲辣，好彩跟餐配特飲只係+$10咋。沙冰特飲味道又多選擇……巧克力Oreo沙冰+多cream……正！

呢度食過好幾次，每次一到lunch time就好多人，唔想等太耐可以點半後先嚟，人流會開始少啲。第一次嚟呢度嗰陣嘅感覺係好懷舊，圍繞住都係關於音樂嘅嘢。門口左手邊嘅裝修好似舊時啲髮廊咁，好得意。右手邊會見到有個stage，上面會有啲音響設備同埋舊啲嘅歌手嘅CD呀、漫畫呀、裝飾擺設咁，都係老闆嘅珍藏嚟㗎。曾經遇見過吳浩康同狄易達添。我個人都幾鍾意食烏冬㗎，好多時嚟呢度都會食佢哋嘅泡菜烏冬鍋，好味得嚟啲餸菜又多，就算啲烏冬浸住喺啲咁熱嘅湯入面一段時間都唔會浸爛，依然保持到口感，食烏冬最緊要夠彈口先好食㗎嘛😋泡菜香辣帶少少酸，雞肉煎香咗再放入鍋口感特別香口。檸水唔會有苦澀味。