悅鮨 (Moved) New Location

要過海辦事，順便俾個理由食餐好...比預訂時間早到，餐廳人唔多。可能因為咁，招呼特別好？點咗魚生飯同壽司定食，再加咗三款魚生：油甘魚、帶子、池魚。魚生先上場：油甘魚肥美，但味道偏淡。帶子好新鮮，並帶甜味，池魚以魚碎混合蔥、(薑？)形式登場，魚鮮味被搶走晒，出唔到。定食包沙律，不過啲汁比較酸同帶點苦，唔係咁欣賞。麵豉湯，好足料好夠味，不過飲完會口渴喎。主角先後登場，先講壽司，size比較細件頭，但魚生幾大片。飯仍然係微暖，上枱前已經加咗少少wasabi同少少醬油，新鮮美味！魚生飯算大份，魚生好多、飯亦夠味。其中海膽，太太同我都覺得係日本本土以外最好食(註：本人倆其實很少食海膽...)。定食仲包烏冬，可熱食或凍食，我哋選擇咗凍食。烏冬煙韌，不過煮得唔係咁透，烏冬本身冇乜味，但個汁就比較咸。本來唔包甜品，不過最後(老闆娘？)送咗雪糕俾我哋。所以有咖啡味同紅豆味雪糕食！估唔到超好味...晚餐價錢唔算平，算係對自己好啲！