Video
Read full review
2018-09-23
4040 views
原意喺想去太子「樂湯雞麵館」試吓佢哋嘅砂鍋雞湯麵，但間鋪細，卻超多人晌門口排隊，都唔知輪到幾時，所以，即時轉場，嚟嗰時途經「芳華絕代」，從門面望落去感覺幾唔錯，就盲撞入去食晏，呢次真喺慌不擇路，中中哋伏。餐廳分上、下兩層，裝修大致一樣，水泥地配上窄窄嘅木枱，較特別喺柱身同橫樑仲喺保持石屎原狀，粗獷原始味，我估其實都有處理過啩，否則會唔會食食吓會石屎剝落或跌啲灰塵。此外，下層有啲特色嘅牆畫，樓上則設有飛標機，俾客人飲吓嘢，輕鬆吓。嚟食午餐，所以，先介紹個午餐餐牌，包餐湯及$36以下嘅飲品，定價視乎所揀嘅主菜，由A到J共10款，款式不拘一國，定價為$78-$158 + 10%。順便貼埋佢哋嘅主餐牌俾大家參考，如大多數西餐廳咁，有沙律、小食、意粉、薄餅、漢堡、燒烤、主菜、甜品，但較特別喺仲有啲中式小菜供應。羅宋湯餐湯就無紅白揀，只有一款羅宋湯，餐湯以公雞碗盛上，賣種型格風。但味道就唔喺好得，無乜料又無乜肉香，而且，明顯喺偏鹹。黑松露雞蟲菇炆伊麵 $78原鍋上，配個小木托盤，賣相少少別緻。不過，友人誤會以為有雞肉，點解食極都喺得啲菇，睇真啲原來喺雞蟲菇，小弟就第一次聽呢個名。此外，無乜松露香氣
餐廳分上、下兩層，裝修大致一樣，水泥地配上窄窄嘅木枱，較特別喺柱身同橫樑仲喺保持石屎原狀，粗獷原始味，我估其實都有處理過啩，否則會唔會食食吓會石屎剝落或跌啲灰塵。
此外，下層有啲特色嘅牆畫，樓上則設有飛標機，俾客人飲吓嘢，輕鬆吓。
嚟食午餐，所以，先介紹個午餐餐牌，包餐湯及$36以下嘅飲品，定價視乎所揀嘅主菜，由A到J共10款，款式不拘一國，定價為$78-$158 + 10%。
順便貼埋佢哋嘅主餐牌俾大家參考，如大多數西餐廳咁，有沙律、小食、意粉、薄餅、漢堡、燒烤、主菜、甜品，但較特別喺仲有啲中式小菜供應。
羅宋湯餐湯就無紅白揀，只有一款羅宋湯，餐湯以公雞碗盛上，賣種型格風。但味道就唔喺好得，無乜料又無乜肉香，而且，明顯喺偏鹹。
黑松露雞蟲菇炆伊麵 $78原鍋上，配個小木托盤，賣相少少別緻。不過，友人誤會以為有雞肉，點解食極都喺得啲菇，睇真啲原來喺雞蟲菇，小弟就第一次聽呢個名。此外，無乜松露香氣，睇落啲麵條亦唔多見點點黑色嘅松露蹤影，似喺只加咗少少松露油而已。朋友就講笑咁話，當食個干燒伊麵囉，包湯、包嘢飲，抵過去酒樓架喇。
鮑魚仔蟹肉燴飯 $88又鮑魚（仔），又蟹肉，滿心期待架，不過，睇樣就知好流。食到尾，蟹肉真喺廖廖無幾，而啲所謂鮑魚仔，應該加多個「迷你」一詞貼切啲，因為每粒都只哋好似個一亳咁上下大，當然，無咩鮑味啦；至於燴飯，喺我諗多咗，定喺佢哋對燴飯嘅定義就喺炒飯底加啲茨汁呢？
香橙汁烤西班牙黑豚豬扒配薯條 $108相比嚟講，碟黑豚豬扒就似模似樣好多，就算未知味道喺點，最起碼件扒嘅呎吋有睇頭，又燒得外觀金黃帶點焦香。試就無試過，而朋友就話質素唔錯，入口上嚟都鬆化，幾有豬肉味，但個燒汁加入香橙嘅元素就未夠突出。
黑松露沙律醬炸薯條 +$10點午餐有個推廣式嘅加配優惠，點解話喺推廣式呢？因為，覺得喺店方認為喺自家拿手小食，平平哋賣出去等人上吓。不過，薯條炸得夠香脆嘅，但個醬無乜黑松露香味，頗隱若。
鮮奶咖啡由於餐飲可揀$36或以下飲品，當然揀啱啱好賣$36嘅鮮奶咖啡啦！始終佢唔間咖啡店，主打亦唔喺咖啡，估唔到杯鮮奶咖啡睇得又飲得，拉花嘅賣相一啲都唔差，入口亦醇厚，口感均勻，喺今餐較出色嘅出品。
講真，食物嘅味道就好一般，服務都喺，其實佢哋都有禮貌嘅，只喺啲店員落單時唔會寫簿，憑記憶點完菜即去撳機，結果就喺漏咗客薯條。店名叫「芳華絕代」，其實，我就唔太知佢含意，不過，應該謝絕再嚟嘞。
Post
