水門雞飯 (萬勤商業大廈)

Open Now

Now Closed

懲罰到停唔到手 🥺 今次試下呢間泰菜，喺尖沙咀好方便。【鴨腿湯河】鴨腿原隻上，我最近牙骹出事，怕隻鴨會韌，點知原來用筷子都可以將肉同骨分開。鴨肉煮得腍身，個湯幾香濃，配粗河粉同芽菜，好食 😋 Remind me of 清邁夜市嘅美味鴨腿湯粉 😭【水門雞飯】雞肉好嫩滑，雞皮薄薄唔肥膩，飯味偏淡。點佢個泰式醬汁會比較惹味，不過我覺得醬汁偏酸，會鍾意同名另一間黃店嘅醬汁多啲（之前我都有評論過 🤭）。【泰式辣生蝦】一向係我最愛，見到必點。呢間餐廳嘅生蝦幾爽口，唔太辣，不過冰凍至較硬身，如果唔係我牙骹痛應該食得更開心... 🥺【泰式凍奶茶】好橙色呀 😂 泰式奶茶一向偏甜，但都好香滑，又大杯。埋單兩個人百幾蚊，係一間好食得黎又有良心嘅泰國菜，我推薦黃色經濟圈朋友去試下佢 😌

去完泰國返嚟無耐，已經掛住泰式粉麵嘅味道朋友介紹呢度嘅泰茶同粉麵都接近泰國水準，所以今晚就嚟試一試佢我哋叫咗一個【鴨腿湯河】，一個【牛肉湯牛丸生牛肉湯河】，一個【香辣肉碎沙律】，一杯凍嘅【泰式奶茶】。兩碗河粉上枱嘅時候好似好細碗，但食落原來份量都好夠【鴨腿湯河】鴨腿醃得好入味，份量十足，可惜肉質比較鞋，湯底近似喺泰國食到嘅味道，清甜無味精，食完唔會口渴河粉爽滑，但始終係港式河粉，略欠煙韌【牛肉湯牛丸生牛肉湯河】湯底唔及鴨河咁濃，不過都清甜，牛丸爽口有少少香茅味，生牛肉入口嫩滑，但牛味有少少失色。【香辣肉碎沙律】酸味同辣味十足，個人鍾意食辣，所以覺得好過癮唔食得辣嘅人千其唔好叫【泰式奶茶】比起泰國嘅味道，雖然做唔到100%，但以香港水準嚟講，已經值100分$20/杯算係超值。店員大部分都係年青人，經驗雖然不足，不過態度都好好，值得一讚希望小店保持水準，期待下次再試埋招牌雞飯