麵屋一平安

Open Now

Now Closed

同大少、小妹去完科學館玩，佢哋話想食麵，就同佢去咗呢間店。呢間店環境企理乾淨。我哋夜晚6:30去，人流唔算多，食到7:00左右就坐滿晒人。明太子煎蛋:蛋夠鬆軟夠厚，裏面明太子鹹香味夠，好似食緊海綿蛋糕咁軟綿綿。雞皮餃子:外層煎到脆卜卜，非常香口，裏面嘅肉好夠味，外脆內軟，加上少少檸檬汁中和返油膩感。蔥花牛舌:牛舌切到薄片，煎得好香口，又唔係好油膩，加上少少蔥花，味道啱啱好。麻婆豆腐拉麵:期間限定嘅麻婆豆腐拉麵，一啲都唔辣，絕對啱唔食得辣嘅朋友。拉麵好爽口彈牙，豆腐夠滑，個湯好濃郁好好味，食完麵忍唔住會飲埋碗湯，加埋粒流心蛋，簡直無敵。特製沾麵:啲麵夠晒粗，煙煙韌韌好有咬口。之前食過嘅沾麵啲湯超級鹹，今次嘅湯濃得來又唔太鹹，連埋麵一齊食味道啱啱好，叉燒肥瘦適中，紫菜亦都好乾身，加埋粒溫泉蛋，食完好滿足。明太子魚餅:上到枱仲熱辣辣出晒煙，咬落去魚餅煙靭，驚喜係魚肉甜甜地，加上子鹹鹹地，味道好特別。

星期日同老公到尖沙咀麵屋一平安食晚飯。廚房慢工出細貨，需要耐心等候食物出爐。雞皮餃子即係用雞皮包住雞肉餡，包到好似餃子甘煎，煎到外皮好脆口，幾特別。日本和牛壽喜燒鍋材料豐富，有肥牛、豆腐、冬菇、娃娃菜、菠菜、魚糕片、蛋，鍾意個湯底唔會好甜，抵食。特製沾麵比較粗身既麵浸係湯到先食，湯底唔會好鹹，豬膶肉片都好食，有咬口。特製低溫叉燒拉麵叉燒呈粉紅色，口感嫩滑又軟腍，拉麵相對幼身同偏硬，好味。麻婆豆腐拉麵麻婆豆腐同拉麵都幾夾，辣辣地，好惹味，正。