今期推介一個高CP值+價錢合理+超班環境美食嘅好去處！
想要旅行feel，唔一定要book staycation咁麻煩嘅。位於20樓嘅“KABOOM”儼如尖沙咀空中花園。佔地兩層，室內天花鋪滿長竹枝，配上石磚牆身、户外藤椅同木枱，再以懸掛藤燈點綴，好似置身海邊酒吧嘅純樸氣氛。
落地玻璃可以飽覽維港靚景～坐喺藤椅攬住厚咕𠱸好chill。無論係食Lunch、Happy Hour定夜晚同朋友飲酒食飯都一流嘅all-in-one casual dining好地方呀！
頂樓室外空間則放滿陽草傘、寬敞藤椅，配上芬蘭木材、藤料塑造滿滿外國氣氛，遠離繁囂。開揚環境更可欣賞維港海景，好啱閨蜜約會又或三五知己飲酒慢活。
估唔到户外都咁涼爽好風，就算怕熱都唔使擔心。不過大家要注意落雨天唔會開放㗎，訂枱前留意一下天氣預報～
嚟到望住維港靚景，梗係輕酌兩杯先啱氣氛啦。所以調酒師設計咗12款打卡cocktail；並由外籍主廚設計多款小食、主菜。
【外籍主廚設計】東南亞風酒吧料理
呢度氣氛好啱飲酒傾計，所以有好多sharing佐酒小食，好似去咗cocktail party咁。
Tuna Cups | 吞拿魚杯
新鮮吞拿魚加上芝麻醬，每件撻都好爆餡料，一啖一件好方便。
Kaboom Sharing Platter | 小食拼盤
呢度嘅小食拼盤好抵食，份量豐富足夠2-3人分享。有雞翼、雞尾酒蝦、串燒、毛豆，仲有烘法包可以蘸醬食。
Rice Paper Rolls | 米紙卷
好鍾意米紙卷Q彈口感，入面包滿蝦、蘿蔔、生菜、青瓜、芒果，新鮮配料清新健康，配埋檸檬草同甜辣醬好開胃，閨蜜聚會必食。
Satay Skewer | 沙嗲串燒
串燒有豬肉、雞肉揀，燒到好外脆內嫩，好鍾意佢夠厚肉同juicy。沙嗲醬好香花生味，蘸滿醬食勁惹味。
唔好以為“KABOOM” 只得小食出色，佢地既主食都好吸引㗎！
Chargrilled Beef Strip with Roasted Vegetable and Gravy
炭烤牛肉 配烤蔬菜及肉汁
炭燒牛肉最重要keep到肉汁，有原始肉味鹹香。而且蔬菜都係輕烤，上枱時仲好清爽翠綠，蘸少少肉汁食好正。
Beef Rendang Open Ravioli with Braised Tender Beef Bites
巴東牛肉配意大利餛飩
Ravioli係意大利餛飩其中一種，多數都係方型小餛飩。今次大廚就將Ravioli巨大化，變成一大件嘅Open Ravioli。充滿蛋香嘅餛飩皮，入面係滿滿巴東牛肉餡料。
食嗰陣將濃郁辛辣嘅嫩牛肉，連埋餛飩皮、芝士一齊食，口感好似意大利餛飩同意大利千層麵之間，好有新鮮感。
Typhoon Shelter Style Crab Pasta | 避風塘軟殼蟹意粉
外籍大廚創作咗唔少fusion菜，軟殼蟹意粉就係其中之一喇。大廚將避風塘辣椒，撞上東南亞風味香茅、青檸等，惹味香口又幾清爽，飲酒一流呀。
Tom Yum Gong Risotto with Seafood Galore | 冬蔭功燴飯配海鮮
呢度嘅峇里度假風，就令人想食啲酸酸辣辣料理。呢道冬蔭功燴飯酸辣濃郁，加埋滿滿海鮮—大蝦、扇貝、軟殼蟹好鮮甜。飲啖熱湯，再食件清爽蓮藕片解吓辣幾正。
【Lunch Menu】下晝都有飲酒地方啦
Lunch Menu都幾豐富，有前菜、主菜或者追加小食都得，有時下晝想約friend食嘢飲吓酒就啱晒啦。
Slow-cooked Chicken Thigh | 慢燉雞腿
慢燉煮法將雞髀煮到好入味，就算咁厚肉都完全唔韌。配上微酸特製番茄汁勁佐飯，好快就食到清碟啦。
Pan Seared Sole Fillet | 香煎龍脷柳
下晝唔想做食肉獸，食吓魚都唔錯㗎。龍脷柳煎得金黃，魚肉都幾嫩滑，配埋峇里風嘅辣椒椰子醬拌飯好正。
【專業調酒師 | 即場調製你嘅專屬雞尾酒】
招牌Cocktail “KABOOM”
試想像喺空中花園星空下，微醺閒聊真係好浪漫。調酒師以獨特手法調製招牌雞尾酒“KABOOM”，係一杯以奶茶做主調嘅雞尾酒嚟㗎。
12款獨家Cocktail 以酒表達心情
同場特調12款獨家雞尾酒都好IGable，全部都係以心情主題創作，想表白又無勇氣、憎對方又唔敢講出口？喺度以酒寄意啦～
"If Not Now, When?" 以班蘭為主調，入口好refreshing。
Pho"Damn Pissed Off!" 罕有份子料理雞尾酒，再配熱情果同菠蘿汁。浴缸外型都好特別，「沖完涼」一定好心情啦！
"Life Sucks, Let’s Get Drunk!" 外型同味道都好椰子。正如其名…唔使講咁多喇，飲啦！
KABOOM
地址: 尖沙咀北京道12A號太子集團中心20樓
電話: 37088114