厭倦正正經經嘅食飯環境，一向大玩港式幽默嘅“GoodDay BadDay MamaDay”就打破悶局，不時有Live Band表演炒熱氣氛外，全店更放滿搞鬼畫作、公仔同霓虹燈；有時又會發現大大幅The Simpsons壁畫、愛因斯坦伸脷石牆，總之每個角落都有小驚喜。
限定生蠔優惠！
踏入冬季正正係生蠔時令季節，蠔肉特別豐富鮮美，“GoodDay BadDay MamaDay”都乘勢引入日本、法國、美國生蠔啦。即刻捉緊限定生蠔優惠: 10隻生蠔+紅／白酒2杯只需$198咋。食埋其他一系列生蠔料理，絕對係蠔迷福音呀。
生蠔優惠詳情
10隻生蠔(日本蠔4隻、法國蠔3隻、美國蠔3隻) 及紅／白酒2杯 優惠價: $198 |
【生蠔系列】有德國啤又有砵酒又玩火
忌廉啤酒煮蠔(8隻)$168
日本北海道真蠔出名海水味重，“GoodDay BadDay MamaDay”再用德國啤酒秘製煮法，利用麥香酒味突顯蠔肉鮮甜。好鍾意個忌廉汁，絲滑濃郁得嚟又有酒香，用脆脆蝦片蘸嚟食幾過癮。
砵酒蠔肉Pizza$138
薄餅上面，鋪滿酒樓或大排檔常見嘅砵酒蠔肉，蠔肉邊有啲焦脆，咬開仲會爆出蠔汁又帶啲香甜砵酒味。而且薄餅係薄脆批底，加埋薯蓉底、砵酒蠔肉，有種又脆又綿多重口感。
火焰北海道蠔肉拿破崙意粉$138
真係大癲拿破崙意粉!! 雖然個意粉名寫咗係火焰，但無諗過真係幾大火(笑)。員工會即席將威士忌點火再淋上意粉，邊燒邊聞到好勁酒香啊！而且炸北海道蠔肉幾大隻，絕對夠你一啖蠔、一啖意粉，就算share都幾滿足。
【爆紅料理】識食一定食呢啲
除咗新推出嘅生蠔料理，“GoodDay BadDay MamaDay”有幾款招牌料理都大受歡迎。如果隔籬枱一坐低就嗌碟英國封門牛柳、芝士龍蝦火鍋，你就知佢識食啦。
英國封門牛柳(220g)$288
呢度嘅封門柳咁受歡迎，因為真係keep到肉味特濃。其實呢個肉位係牛隔膜肉，位於牛腹兩側、靠近前腿之間，可想而知活動量有幾高!! 所以肉質特別彈牙，會越咬越出肉味啊。而且每隻牛得一塊封門柳，所以唔係成日食到㗎。
芝士龍蝦火鍋$398
冬天特別掛住芝士火鍋，“GoodDay BadDay MamaDay”嘅芝士火鍋仲有矜貴食材—波士頓龍蝦、日本帆立貝，加埋新西蘭青口、西蘭花、方包粒、薯仔呢啲掛汁配料，每啖都爆滿芝士真係好滿足!! 將啲配料浸落芝士嗰陣，已經feel到芝士質地好綿密濃郁，冬天食真係暖笠笠。
GoodDay BadDay MamaDay
地址: 尖沙咀加連威老道27-27A號嘉榮大廈地舖及1樓
電話: 94241449