近期大家都迷「黑白大廚」，都想飛去韓國試下佢哋的手勢，不過小編發現喺香港都有間好出色的韓國菜餐廳「釜山商會」，主理人喺呢位Oppa由釜山遠赴香港，喺尖沙咀韓國街開設「釜山商會」。
「釜山商會」門口唯美藍色霓虹燈。
佢嘅故事要數到Oppa出世之年—1990年。當年Oppa嫲嫲喺釜山家鄉以自家手藝開咗一間湯飯小館，招牌豬肉湯飯深受街坊喜愛。嫲嫲將秘訣傳授媽媽後，再將豬骨濃湯延伸至豬肉湯麵，以釜山人喜愛嘅素麵配上新鮮大蔥、肉湯及柔軟豬肉一同享用。
澳洲學廚 多國烹飪經驗包括
唔經唔覺，呢道豬肉湯成為Oppa家傳名物，亦係「釜山商會」嘅招牌料理，大家去尖沙咀就食到啦。Oppa入廚之路由嫲嫲啟發，卻於澳洲付諸實行。2012年Oppa只帶一把刀，踏上澳洲冒險之旅學習西餐。眨眼12年於各種廚房工作，包括英國米芝蓮餐廳。
Oppa由外國學廚回流，於韓國破格地開設英國料理餐館引嚟迴響。(SBS電視台畫面)
多國烹飪經驗令Oppa喺韓國、新加坡成功經營英國、日本、韓國料理餐廳。當中，英國餐館更為韓國人帶嚟驚喜，因為當地好少食到外國料理，此舉亦吸引韓國電視台採訪Oppa掌廚故事同分享技巧㗎。
用心鑽研多國廚藝亦無忘初心，繼續傳承家鄉釜山料理。(SBS電視台畫面)
獨特創新 醬油蝦奶油意大利麵
2024年甫到香港，Oppa就被香港茶餐廳深深吸引，多國料理兼容並包，互相融合卻又發展出獨特風味，對入廚嘅佢好大啟發。茶餐廳嘅湯通心粉就係例子之一，原來Oppa喺外國都未食過呢種煮法，估唔到效果咁好食。
Oppa受茶餐廳多元兼容特色啟發，以湯通心粉為靈感創作醬油蝦奶油意大利麵。
醬油蝦好彈牙，兼富鹹鮮發酵及酒香嘅深邃感。綿滑柔和嘅新西蘭奶油，恰好平衡鹹香相當驚喜。
同時令佢反思嚟到香港之後點創作? 於是以湯通心粉為靈感，創作呢款獨特料理—醬油蝦奶油意大利麵。將韓國廚師發酵嘅醬油蝦；加上新西蘭新鮮乳製品，締造柔滑鹹香層次，一嘗融合西方及東洋元素嘅煮法。
韓國拌飯食法又係另一種風味。紫菜增加層次咬口，米飯則牢牢鎖住奶油醬汁更滿足。
「釜山商會」有咩食?
「釜山商會」之取名，係Oppa對釜山及商業寄望。因為1960年時，好多企業家聚集釜山小餐館分享生意抱負，自然而然地形成海雲台豬肉湯飯一條街。
每枱都有鴨仔紙巾盒好可愛，座位闊落舒服。
一坐低就有6款免費韓國前菜，每3至4個月會轉換款式保持新鮮感。
呢度唔只食到Oppa嫲嫲家傳至今嘅釜山豬肉湯飯、釜山豬肉湯麵，同場醬油蟹亦依當地人做法，用高濃度釜山燒酒醃製逼出獨特蟹香。而最吸睛係3款滾住食嘅鍋物，今個秋冬好似韓國人咁邊飲燒酒、邊食熱辣辣鍋物，正啊。
韓國人喺秋冬好鍾意食鍋物，呢度都有3款鍋物揀㗎。
【嫲嫲家傳秘方】
釜山豬肉湯麵
第一眼見到咁濃厚嘅豬骨白湯，真係幾有驚喜。依嫲嫲家傳秘方用豬骨熬煮72小時先做到咁白身。而且貫徹釜山料理嘅簡約傳統，配料主要係豬肉同釜山人鍾意嘅白素麵，滑嘟嘟素麵好掛湯，每啖都食到豬肉濃香啊。
釜山豬肉湯麵。濃郁白湯底係用豬骨熬煮72小時而成。
睇吓湯身幾濃郁。
釜山地道白素麵，柔軟掛湯。
釜山豬肉湯飯
另一款釜山豬肉湯飯都係自家濃骨湯做主角，唔同之處係用石鍋呈上。Oppa提到石鍋食法係由爸爸嗰代延續落嚟，因為上一代時期嘅釜山處於備戰狀態，釜山男人連飲食文化都man啲，習慣一邊飲酒、一邊食飯，一飲可能就幾個鐘喇，所以會用石鍋上keep住溫度。
釜山豬肉湯飯，因為歷史原因以石鍋呈上。
嚟到Oppa呢一代，雖然無咗咁man嘅習慣，但佢哋都好鍾意熱辣辣嘅石鍋飯㗎，有時亦會當作解酒料理。嚟到不妨用味蕾感受吓釜山歷史延續落嚟嘅料理啦。
【釜山風味醬油蟹】
除咗Oppa來港創作嘅醬油蝦奶油意大利麵，當然唔少得醬油蟹!! 特地用釜山燒酒醃製醬油蟹，因酒精濃度特高，強烈酒味更逼出蟹香，比平時更富酒香鮮味㗎。
醬油蟹用釜山燒酒醃製，高酒精特點突出蟹香。
醬油蟹好爆膏。
用蟹蓋將蟹膏、白飯、紫菜撈勻食，又係另一種風味。
【3款打卡鍋物】
「釜山商會」有好多打卡料理，當中必食Oppa設計兼疊到塔咁高嘅龍頭山塔辣豬骨鍋。仲有滾住食嘅炸醬麵試過未? 份量爆滿3個人食都得啊，即睇詳情～
龍頭山塔辣豬骨鍋
店家以「釜山龍頭山塔」為靈感，將豬肋骨疊到塔咁高，「塔頂」仲有一大球特製辣醬，將辣醬撈入濃郁高湯滾住食，辣得幾過癮。
龍頭山塔辣豬骨鍋。以「釜山龍頭山塔」為靈感，將豬肋骨疊到塔咁高。
見到豬肋骨疊到咁高唔知點入手……Oppa就話有3種食法，可以拎起豬肋骨捲拉絲芝士等等。
豬肋骨有3種食法，捲住拉絲芝士係食法之一，正啊。
海鮮炸醬麵
真係未食過有爐滾住嘅炸醬麵，目測有兩個麵超大份，上面仲有5隻大蝦、八爪魚、蔬菜，3個人share都好夠啊!! 上枱之後等炸醬汁慢慢滾起，邊滾邊食幾有氣氛喎。
好少見滾住食嘅海鮮炸醬麵。
南浦洞特色燉煮拼盤
選擇困難咩都想食，揀燉煮拼盤就啱喇。集合人氣配料—八爪魚、大蝦、五花肉、粉絲等，加埋韓式辣湯熱住食，好有風味。
南浦洞特色燉煮拼盤，集合人氣配料—八爪魚、大蝦、五花肉、粉絲等。
八爪魚好大隻Q彈啊。
五花肉煮到好軟嫩，辣辣哋又有油香。
【探索釜山國際市場】
釜山國際市場擁悠久歷史，場內過百攤檔售賣各類海鮮、特產、食材，富濃厚地道氣氛。Oppa話開店之初，受釜山國際市場食材獲靈感，設計咗一系列地道料理。
慶尚道冷麵
其中一款受啟發料理，就有呢道韓國冷麵。湯頭都係用豬骨熬製，但大大縮短熬煮時間，恰好熬出豬肉香又令湯身清徹輕爽，好突出到釜山素麵嘅柔軟口感。
慶尚道冷麵，縮短熬煮時間令湯身清徹。
釜山豬肉拌麵
釜山料理簡約直接，反而更突出食材、辣醬同素麵味道口感。好似呢道拌麵，食之前將韓式辣醬拌勻，辣味恰好又唔會搶咗豬肉、白泡菜同紫菜味，而且72小時慢煮豬肉又好軟腍，好鍾意呢種簡單地道嘅風味。
釜山豬肉拌麵。配料簡約直接，味道更有層次。
辣味恰好又唔會搶咗豬肉、白泡菜同紫菜味。
【肉控福音】
韓國菜包肉(Ssambap)、炸雞都係啖啖肉大滿足！「釜山商會」呢度都有得食㗎。
釜山白切肉
唔講唔知，原來釜山人好少落鹽，反而用醃鹹蝦帶出鹹味。所以呢道釜山白切肉有兩種食法，放上醃鹹蝦、蒜頭係釜山地道食法；用韓式辣醬就係韓國普遍食法，睇吓自己鍾意咩口味喇。
釜山白切肉有兩種食法。
(左) 放上醃鹹蝦、蒜頭係釜山地道食法。
(右) 用韓式辣醬係韓國普遍食法。
罐頭市場風味炸雞
究竟咩係罐頭市場呢? 原來係釜山國際市場前身，因為以前生活較窮困，市場都係賣罐頭為主而得名。呢款炸雞就係當時做法，所以醬汁味道、雞件切法都會粗獷啲，你又食唔食得出個分別呢?
罐頭市場風味炸雞。沿用釜山舊時做法，醬汁味道、雞件切法都會粗獷啲。
可以自己淋上醬汁。
釜山商會
地址: 尖沙咀金巴利道79-81號金栢閣地下A-C號舖
電話: 37584517