厚福火鍋海鮮專門店 (Closed)

聽咗M先生極力推介呢間，阿媽行樓梯都要嚟食喎。跟住佢介紹嘅嚟叫。粟米斑塊，熱辣辣，皮唔夠鬆，浸落啲濃稠適中嘅湯芡都幾好味。原本擔心2歲嘅姪女唔食炸魚，點知佢食完呢樣唔肯食飯😂燒鵝，唔夠熱，但啲皮好脆仲冇乜肥膏。瑤柱蛋白炒飯，就姪女口味走葱，點知佢掛住食魚唔多食。啲飯炒得夠乾身，飯底有落湯。薑葱蠔，燙口，蠔味重。蛋黃蝦，都幾大隻，蝦肉唔夠彈，但個蛋黃起沙，鹹味剛好，$78有十幾隻。雜菜煲，味道幾清，好多材料。果皮蒸鮑魚，大過隻匙羹，軟嫩鮮，$68半打，正！整體味道偏淡口，因我食完連輕微味精反應都冇，脷都冇變嚡。下次我要嚟食龍蝦！

本人第一次寫食評，係因為太過激氣 事因係叫咗兩罐可樂，個侍應拎咗兩罐完全冇雪過既可樂，我地話唔凍，佢就話加冰飲，我地話咁你個經理来(因哩間係火鍋店)跟住個部長就走來話(唔凍咪加冰飲囉。。(仲要好勞氣))仲話使唔使咁麻煩呀 之後同個店長理論，店長就叫部長道歉，個部長仲好寸咁話，(講咗唔好意思啦，係咪太細聲聽唔到呀)我朋友話(係)，因為佢跟本冇講！！！而咁啱隔離枱叫咗龍蝦，點知來到D龍蝦灰黑色(似唔新鮮)叫店長理論，店長話一定係新鮮，之後走咗去…等咗成十分鐘都冇人理，佢地再嘈，要求取消單，後尾先處理。。。 哩間D質素太過份。。服務態度極差。。連收銀員都係，因要自行去埋單，我要求要收據，而個收銀員揾咗五分鐘先揾到單簿，寫完之後黑面比我 咁嘅公司遲早摺

今日lunch 自己一個，又唔想再食快餐，於是去飲唐茶，等咗一陣就有位。 諗咗好耐終於諗到食一碟叉燒飯，點知原來碟叉燒真係好好味。 叉燒唔肥，又好林，又夠熱，食落又有口感。總之就係喜出望外拉 加埋加一茶芥45元坐一個鍾，very good