又一間餐室

Open Now

Now Closed

噚日（11-10-2024 Fri）重陽節假期朝要食早餐喇，呢間開咗幾日，但未有堂食，都走嚟睇睇啦，見到有茶餐廳嘅嘢，亦有港式同台灣小食，又有日式拉麵。最後我哋決定要$40.00嘅B餐，要雞扒，要熱奶茶；$38.00嘅細至尊狗仔粉同$38.00嘅大塊頭西多士餐，要熱奶茶。買完我睇睇張單，我個餐我係冇話要牛油多士，點知佢擅自加咗我$2.00轉咗，唔轉都轉咗，算啦。咁我就交俾老公就喺喥等，我去街市買雞蛋，買完行返上嚟，老公重企喺喥等，等多陣就齊，由落單到有得攞，都等咗15分鐘，收銀話即叫即整，下次可以掃QR code落單俾錢，就唔使企喺喥咁耐。返到屋企打開晒，熱奶茶大大杯同好熱，影完相食得。我先食雞扒，有兩件，味道係甜，似有蜜糖，個皮唔脆，但肉嫩嘅；沙律就正常冇問題。2.25分牛油多士就又薄又細件，烘得唔多，牛油亦唔多，食落，已經受潮韌咗，牛油味怪。0.5分奶茶就茶多濃味，有少少澀。2.3分大塊頭西多士，中間係正常有花生醬，係有花生粒嘅花生醬，食落，好彩糖漿唔係落太多，Ok嘅。3分我最後至食至尊狗仔粉，呢個有豬油渣，冬菇同蝦米。湯嘅味道唔太鹹，質地杰，除咗蝦米外，其他食材都係腍。3分其他:

噚日（12-10-2024 Sat）朝肚餓要食嘢，由於我唔想食熱氣嘢，就由老公發版，佢又嚟要等好耐嘅呢間買，今次佢精喇，買“應該”已整好晒嘅嘢，咁就唔使等咁耐啦，佢就買咗$38.00嘅粥粉麵餐，皮蛋鹹瘦肉粥配豉油皇肉碎炒麵，同$32.00嘅點心餐，要叉燒腸（2條）同蝦餃（2粒），飲熱鴛鴦。買到返嚟打開睇，點解係兩套一模一樣嘅粥粉麵餐？唉！老公冇細心睇，而且都拎到返嚟，唔去換，照食啦。豉油皇肉碎炒麵好油，係太多油而味道好濃，材料就有芝麻，椰菜，蘿蔔絲同洋蔥，至於肉碎，係完全冇。2分皮蛋鹹瘦肉粥，粥杰， 鹹瘦肉係鹹但好鬆軟但有啲膻味，食到最後我覺得有味精。1.7分服務：老公話佢去到，店員同佢講可電子落單，又問有冇揀扒類，有就即刻幫佢煎咗先。老公答冇。點知落完單都等幾耐至有，重要係俾錯嘢。抵食：其實我睇返張單，點心餐唔多嘢食，都要$32.00，呢一刻，佢哋只係做外賣，唔平。1.5分其他：經過前日嘅經驗，今次老公主動講走餐具。題外話：接我上篇問又一間咩嘢？呢篇有答案啦。