嚐糖

Open Now

Now Closed

成日有人話人有兩個胃。。一個食正餐一個食甜品!的確，晚餐食得飽飽。。出去散步一陣又去去左呢到食甜品啦！呢間係第一次光顧，甜品都好有水準呀！其實這店好細，座位唔多，人手都係得兩個，但甜品種類有好多！我地兩個人叫左4樣野。。真係第二個胃啦！首先係特濃阿華田布甸。布甸好香好滑，阿華田味香濃，上面仲加左可可米同粟米片，加左d咬口，係唔錯既選擇！跟住再黎一個桑寄生蓮子蛋茶，呢個佢地加左西米，一般出面無見過，覺得好特別。味道啱啱好，我好驚d好甜嘅糖水，呢個唔會！蛋唔會過熟，唔似浸左好耐個d,good!下一樣係榴槤豆腐花，我既另一半太愛榴槤啦，追加多一份榴槤另加花奶!榴槤味香濃，但豆腐花個味似係盒裝豆腐花(百x)，但榴槤香濃可以補返呢個不足!最後係鮮奶燉栗子西米蛋白!呢款好出色，香滑!栗子粒粒分明，唔會碎曬!唯一就係太稀啦！其實上枱嘅時候，老闆已經講左要等分半鐘先食，我地絕對等多過呢個時間架!如果可以實多少少就好啦！仲有好多想試，下次見!

嚐糖雖然唔出名 而且店鋪細 但賣點卻好吸引我 就係佢既店鋪設計 店內設計成為學校班房既樣 有黑板有木枱木櫈 同中學既朋友一齊黎食糖水即刻諗起大家中學既趣事😂呢間甜品鋪雖然細 但甜品款式都唔算少 基本上最普通甜品店應該有既款式都有 但冇其他特別既招牌甜品😔有少少可惜 我最後嗌左綿綿冰 但因為融得太快 打唔到卡呢間既綿綿冰冇咩特別 亦都唔算特別好味 同埋值得食 但都因為第一次食就有少少失望 所以我未必會再黎食 雖然環境真係好特別😂

同朋友食完飯佢話我哋去「上堂」洛!! 拋低書包幾廿年嘅我靜咗一陣.....上堂?! 朋友:係呀…「嚐糖」..跟我行啦！跟隨友人步伐來到「嚐糖」急唔住模仿個tone ，朋友..你邊度鄉下㗎!!離開大商場，過條馬路一條直路嚟到屋苑範圍， 地點都幾幽靜，呢間嚐糖門口卻很熱鬧，係友人呢種地膽通先識入屋苑搵食!等一陣就有位，餐牌都幾功課簿款，甜品都有啲特別花款，啲名又幾得意。暖身法寶，熱辣辣用蓋子蓋著上枱，等一陣先食得，等嘅過程勁心急!! 牛乳味香重，口感細滑。糖不甩，面層灑著的花生糖好香、花生唔un牙(老人老重點)，整顆質地Q軟，屬我喜歡類型。酒糟丸子，對於這個我是不偏好，朋友嚷著要我試，出奇比餐館的好食，淡淡的酒香，沒有我心中存在的「臭」，甜度恰到好處。丸子還是推薦的Q軟質地，還有湯丸。在這裏看到職員和客人的關係很好，街坊的食店總有一份人情味!!

將軍澳有咩甜品好食？今晚就試咗依間<嚐糖>, 之前都見到好多人打卡。我一睇個Menu就好有青春氣息🌱🎒不過5想做功課丫🙅🏼‍♀️🤣🤣🤣🤣一打開又好趣稚🤪相信5少人會自嘲Dry爆😹😹😹 亦有5少女神👑燕窩腐竹白果薏米豆腐花糖水好滑好滋潤芒果益力多綿綿冰 + 椰果涼粉 芒果汁🍹視覺享受比味覺多！ 其實可以多d芒果汁，因為食過綿綿冰既人都知 d冰係無味架 ～冰天雪丸豆腐花: 真係正，滑脫脫，配上好有咬口既小丸子，仲有雪糕湯圓🍡🍨🥣 芒果西米露：不過不失。呢個甜品芒果是重點吧。

話說係將軍澳成日食糖水,但成日經過呢間鋪頭都不屑一顧,因為門面太簡陋,感覺伏伏地,所以一直只係pop corn pop walk果d食。今次因為朋友極力推介,即管試一次,買左墾丁紫米哥同九份竽圓王,因為好近屋企所以選擇外賣番去慢慢嘆!!事實證明原來真係唔可以以貌取"鋪",九份竽圓王非常足料,有地瓜圓竽圓同綠茶圓,仲有豆腐花同涼粉,d圓圓全部都好有味,尤以綠茶圓最突出!果陣綠茶味每咬一啖都滲到出黎,口感煙un,超有咬口~大愛!涼粉同紅豆豆腐花配搭得宜,老公唔食薑汁所以轉左做椰汁~甜度適中!好味!!墾丁紫米哥都有齊地瓜圓竽圓同綠茶圓,睇menu以為得竽圓,真係好surprise喔!!椰汁紫米露都唔會好漏,竽頭又夠粉,不過食哂成碗真係好飽~係非常滿足既飽飽呢menu仲有好多其他選擇~

今日係冬至，同老公食完晚飯梗係覺得冬至要食湯丸應下節。向來我都比較鐘意光顧小店，所以我地就特登走去位於屋苑附近的糖水小店。9 點幾去到唔洗排隊，入面有兩台客，食客都跟幾個姐姐店員係度行話家常。我叫左熱既腐竹薏米加湯丸（今日重點）老公叫左熱既紫薯正妹。腐竹薏米，熱辣辣入面仲有白果，仲有兩粒煙韌既芝麻湯圓，好味紫薯正妹，即係紫薯奶西米，芋頭芋圓，芋圓超煙韌，但紫薯奶味道比較化學，普通普通雖然唔係話特别好味，但飯後去依類小店，食既人情味，往往是另有一番風味

收工之後 同事問我有無興趣去【嚐糖】我都要問下hubby hubby say Ok就同班 同事 一起 嚐糖 去搭港鐵到將軍澳站 行5 mins就到la一行7人 一到班房 我都未睇佢地就好快咁叫左幾個 小食有台式醉雞翼，燒賣同蒜香菜肉餃子同埋貼堂作品--芒果腸粉跟住一人再叫多一個糖水我就叫左 墾丁紫米哥都未睇完menu d野食開始到呢個芒果腸粉 好吸引個皮 好滑 好似腸粉皮咁薄身加上芒果都好甜 為夏天帶來一點爽快感台式醉雞翼酒味唔會好濃 d雞翼唔會話雪到硬晒肉質都仲keep到滑身蒜香菜肉餃子雖然我唔太好餃子類但都可以試下d炸蒜 好香餃子都好多肉多菜唔算差紫米哥到了就係有椰汁紫米露+香芋+芋圓+海底椰味道都ok但個芋頭就生水(唔粉)芋圓我覺得太林 但綠茶味好食海底椰肉都好好咬口 但有d碎今堂 大家傾計都傾到傻同學仔食ge芒果小丸子 + 雪米磁呢個係 另一個同學食的紫薯正妹落左堂 仲要趕last train

當將軍澳大型商場一個連接一個，搵到小店真係會有驚喜！呢間鋪細細，所以座位不多，只約有10個座位，但乾淨企理的！Menu行校園風，好有心思，我好鐘意，絕對唔係Hea你！而且好多款式，平至2x$中式甜品、貴至200$ 燕窩都有得食，實有款岩你心水《必推》芒果腸粉連個碟都係冰鎮，好有誠意！腸粉皮超滑，芒果好大舊，芒果醬增加甜味！入口係有涼意墾丁紫米哥有芋圓（味道濃郁，特別綠茶味，但略嫌唔夠軟熟）+椰汁紫米露+香芋蓉（好大舊）+海底椰店鋪逢星期二休息，千祈唔好摸門釘啦！

和朋友晚飯過後，朋友們都推介這間嚐糖甜品店！而且我也被他們的大大餐牌吸引着，糖水的款式非常多，真的有選擇困難症的我很難入手。我覺得價錢尚算適中，這間鋪頭最特別就是他店舖的名字，嚐糖，上堂！講到上堂，真的有少少好像回到中學時期的感覺！中學時期又點會少得有書枱和書本呢！他的門面有一個大大的招牌，寫着嚐糖！而且還有滿天星的裝飾，超級有氣氛！這本其實是Menu十分有趣！我和幾個朋友分別嗌了幾個糖水，真的很美味，不用多說先分享相片吧！最後我們真的滿載而歸推薦給大家！

嚐糖 (將軍澳)地址：將軍澳寶盈花園商場地下S1B舖這間甜品店嘅裝修係好似香港嘅中小學課室，書枱、櫈及黑板，都很有校園風格，鋪位面積不大只能容納14人，因此有機會要等候才能入座，食物方面一啲都唔貴，而且榴槤系列及芒果系列都較為出色，今次我就點算了以下兩樣食品：★芒果腸粉 $31椰汁外皮，厚薄適中，芒果口感實，味道香甜清新★榴槤撈河 $30榴槤啖啖肉，椰汁河粉入口凍冰冰非常幼滑，椰味香濃，而且不太甜，好正！下次經過開嘅朋友記得試吓

Miss河--（芒果汁底配涼粉，椰汁河粉，椰果） 帶冰涼的芒果沙冰底 好適合炎氣既天氣去品嚐!推介!!!楊老師---楊枝甘露 配小丸子味道不太甜 怕甜的都可以吃小丸子口感都不錯!!!喜愛楊枝甘露的你 值得一試!

食完飯總是抗拒不了甜品的誘惑😝 ，尋找在popcorn附近的甜品店，發現原來這裡也有嚐糖~ 印象中旺角店都不錯，餐牌和桌椅也營造課室風格, 決定去試一試~一睇餐牌。。發覺選擇比旺角店少。。佈局也完全沒有課室風。。 😐唔。。這次感覺沒太多心水選擇，一d預先拼好的甜品撈又不太合心意，見到有"自選科"，好~ 選了$17黑珍珠底，加$4河粉，$4粒粒啫喱同$6雪米糍，同行的Mr.M則點了他至愛的腐竹蛋湯圓糖水(腐牧師)~先來我的自選糖水，老實說。。一望之下有點失望。。感覺好求其。。唔知有d黑珍珠係咪浸得太耐，有d爛左出黎，差d以為係蟲蟲🙄。。河粉又唔知點解係爛的，😤不是完整一條條。。d啫喱又少。。真係有d唔想食。。好彩俾左粒至愛的香芋雪米糍搭救😶至於腐牧師係幾好味ge，夠香濃，芝麻湯圓也軟綿好食！不過下次未必再來了。。

我點了個榴槤豆腐花， 30蚊，以食物質素同誠意黎講依碗野簡直 '值超所物' x 10 ! 原因? 間舖竟然比碗百福豆腐花我! 整舊百福豆腐花既形狀完完整整地放在外賣碗中! 如果我想食百福豆腐花我自己識去超市買，何需用貴幾倍既價錢在這間自稱為糖水舖既地方食?? then, 豆腐花上的榴槤小到呢! 但這不是問題， 食物可以貴精不貴多，但唔多又唔精我就真係接受唔倒要付錢去食, 果d係加工榴槤蓉，即平時美食展裏有得買，一杯杯果隻，對我黎講即係假榴槤!! 味道假到呢。。。 一間以糖水為主打既舖頭，為何連豆腐花都不是自家制，都係果句，如果我要食百福我自己識去超市買!! 太失望

番得黎將軍澳，當然要搵好兄弟吃宵夜，以前開檔枱開到馬路邊，吾知近幾年係咪又嚴左，只有幾張枱係門口，仲要吃既時候，全程有個保安企係500米外𥄫住，好不舒服！店的設計係似採用學校的style，枱子椅子都係學校的書枱，有點懷舊呢。糖水方面改既名都有少少校園風，好似我叫的「楊老師」，而我兄弟他一坐低就介紹補腦的核桃芝麻俾我，大家可以試下，他說必吃。而我因為天氣熱的關係，我都係叫左楊枝金露，楊枝和金露係萬人敬仰的觀音娘娘手上的寶物，此甜品是人口只有700萬既香港人發明出黎，就証明甜品中之龍，非常寶貴，是必吃之選。好啦，非常期待它的味道，我這個除了基本楊枝金露的底，還有椰果、蘆薈、「小」「丸」「子」！不是bILIBALA櫻桃個個！係一粒粒小小的像無涵湯丸，增加楊枝金露的咬口，令甜度不會過份。說咬口方面，不少得小小的椰果、蘆薈的功勞，而他們是咬完之後會有小小果汁流出，好像在口腔內跳舞。還有芒果腸粉，當然不是用糯米粉造，而是用椰汁，沒有了粘度，帶來的是更滑的口度，中間甜甜酸酸的芒果令太甜膩的椰汁皮，變為更易入口，更開胃。但當心切，會容易像我一樣切到頭尾部分不見了中間的芒果喔。

以課室為主題既一間糖水舖，店內枱櫈都係用以前讀書課室果啲木枱，好有童年回憶。小姐今次叫左鎮店之寶"西瓜大少"，佢每日限定架，賣晒就無。賣相無得輸，成個西瓜切半上，挖左中間啲西瓜肉再加多種唔同配料係入面，例如有椰果，涼粉，小丸子等等，一次過滿足晒多個願望，小丸子特別出色，煮得岩岩好，煙煙韌韌唔會o趙到牙都軟，當造既西瓜肉好甜好多汁，簡直係消暑佳品！