天河食坊 (Closed)

因為男友工作關係,我每次去馬鞍山,都會要佢同我黎呢間小店,因為好掛住呢度既"炸燒賣配糖漿"甜甜地,而且外脆內軟,好好味 ; "炸大腸配酸梅醬"酸酸咪咪好開胃,而且一串有好多粒,又無肥膏; "牛雜"(堂食切記要一串一串咁order,因為一碟既份量無咁多.....等小吃,因為出面其他小食店食唔到呢度獨有既味道,yummy yummy!!

黎開呢度，多數都係食雲南味味米線... 今次忽然間想轉轉口味，就走左入去「天河食坊」。首先要讚下呢度先... 舖仔細細，但調味料款式充足... 醬料齊全，更驚喜的是有甜醬辣椒醬 ~ 好細心，值得加分﹗叫左個兩餸車仔麵餐。麵底係粗麵，要龍蝦丸同蘿蔔.. 再加腩汁。個湯底同想像中唔同... 因為通常 d 腩汁會係杰身少少 (有牛根的關係？)，但呢度係沒有一 pat 腩汁係面，好唔好就見仁見智。而本人覺得個味道係唔錯，只係面頭層油勁左少少。粗麵幾爽，煮得岩岩好。蘿蔔忟得夠晒稔，清甜得黎又冇渣，好﹗而個龍蝦丸就同平時係街市買果 d 一樣... 老實講，好難 expect 佢會自製龍蝦丸卦。除左兩餸麵外，佢會有幾棵生菜，再加分﹗跟餐送豆槳，佢話係自製的.. 但唔好飲，唔重豆味同埋幾甜。$21 午餐，雖然唔係「盡善盡美」，但絕對是小店內的驚喜。

嚟親馬鞍山, 係走時, 都係要食返碗天河小麻辣牛腩牛肚河粉至安樂小麻辣牛腩牛肚河粉$15今次係食過咁多次, 最好的一次, 牛腩及牛肚都算腍, 又入味, 而家凍冰冰食麻辣, 味道特別好味 炸雞翼尖 $6得6只, 太少囉 味道一般啦, 早之叫炸燒賣好過, $6 有5粒, 仲要大大粒

堂食車食麵河粉$5牛腩$5牛肚$5加麻辣汁合共都係$15底食過佢外賣餐單的價錢麻辣五香牛腩河粉$17 送外賣加$1

4月4日晚上,嚟呢度食咗個牛腩雞翼米粉+熱O茶(20蚊)牛腩出奇地好味,坑腩有點肥羔.OK雞翼剛炸起,都幾好米粉就太少啦,得果2嗒O茶街邊一樣,無特別...我就無下面LILY小姐所講既海鮮價,張餐牌寫明,我臨叫前問咗佢地,其實整體都幾好既20蚊雞,唔要求得太多!

同上次Order的一樣外賣麻辣雲吞牛腩河粉(小辣)一碗今次收$16上次叫就$18, 聽同事講呢間野的價錢係海鮮價.早上11點Order 收$17, 同日下午再叫就收$18.外賣單張寫$15, 佢收貴左就話加左價未有新單張.麻辣- 我為麻辣而食佢, 佢竟然走辣, 超失望雲吞- 冇上次咁好, 好粉, 好散牛腩- 今次好"韌", 大部份都"趙"唔到河粉- 一般價錢及食物品質都是海鮮價, 並不穩定!

呢間天河,如果唔係住附近或者因為d人食對面間雲南風味,都好難會發現到!其實佢d嘢食絶對唔差,應該話幾好食,就係門口d牛什,見到都幾吸引,我上次買咗一小碗牛什外賣,腸,肚,膀,肺,全部都好淋好入味,喊咗少少tim,但質數絶對唔錯,服務都幾好,剪牛什亞姐問我,有無邊樣唔要呀,今日d肚好淋,剪多舊比你.我眼見裏面食緊麵既人都食得好滋味,我下次都要試吓!一小碗牛什,承惠10個大洋

外賣麻辣雲吞牛腩河粉(小辣)一碗$18麻辣(小辣) - 好香雲吞- OK新鮮牛腩- 夠"林"河粉- 好滑